menu

NDR Elbphilharmonie

NDR Elbphilharmonie Orchestra, Alemaniako orkestra garrantzitsuenetakoa Kursaalen arituko da berriz, Leonidas Kavakos biolinista karismatikoa bakarlari dela

Gaurkotasuna / 11 azaroa, 2019

Alan Gilbert estatubatuarrak, orain dela gutxi arte New Yorkeko Filarmonikako zuzendari denak, gidatuko du zuzendari hoberenak jaso dituen orkestra prestijiotsu hau

Bihar, azaoak 12, arratsaldeko 20:00tan, Hanburgoko okestra Kursaalen arituko da. Hanburgoko NDR orkestrak bere historiako aldi berri bati heldu dio, eta egoitza artistiko garaikidea aurkitu du Elbphilharmonie areto berrian. Orkestra egoiliar gisa, eginkizun garrantzitsua beteko du Hanburgoko kontzertu-areto berriaren profil musikala tankeratzeko orduan. Alan Gilbert iparramerikarra da, New Yorkeko Filarmonikoa zuzentzetik datorren zuzendari interesgarri bat, aurtengo denboralditik hasita, orkestraren zuzendari nagusia.

Leonidas Kavakos greziarra nazioarteko hainbat sari irabazi dituen biolin-jotzaile goiztiar bat da, eta gaurko saioan Bartoken biolinerako 2. kontzertua eskainiko du, orkestra alemaniarrarekin batera; denbora luzez uste izan zen Bartokek instrumentu honetarako kontzertu bakarra idatzi zuela, 1938koa, baina beste bat aurkitu zen, askoz ere lehenagokoa (1907/08), eta orain azken hori agertzen da lehena delakoan. Aparteko edertasuna du, eta XX. mendeko biolinarentzako errepertorioko obra garrantzitsuenetako bat da. Konpositorearen heldutasun-garaian gaude, eta egonkortuak agertzen dira hemen beste urte batzuetako konnotazio eta eragin posibleak, errealismo magikotik folklorera. Inguruko presio orotatik pixkanakako aldentzea da etapa honen ezaugarri nagusia; ez dago borondate nazionalistarik, nortasun-ikur ukaezinak baizik. Konbinazio instrumentalen gardentasuna, metalen distira, arkuen aberastasun ebakigarria, Andantearen hunkiberatasun magikoa, bat egiten du denak bakarlaria giro liluragarri eta irudimen handiko batez inguratzeko.

Laugarrenarekin batera, zazpigarren sinfonia da Brucknerren obrarik interpretatuena. Leipzigeko Gewandhaus antzokian estreinatu zen 1884ko abenduan, Arthur Nikisch zela podiumean. Esanekotasun diziplinatuz erantzuten diote lau mugimenduek Vienako sinfonia klasikoaren eskemari. Lau itzelezko pieza dira, bai iraupenean, bai sakontasun adierazkorrean. Brucknerrek unibertso goitar batera eramaten du entzulea, bere melodia luze, trinko, inguratzaile, isuri-erraz, plastikoekin. Harritu egiten du egituren soiltasun eta sendotasunarekin, eta liluratu sonoritateen distira eta trinkotasunarekin. Hauxe da, zazpigarren sinfonia, sinfoniaren munduan ezagutzen den lorpen musikal bikainenetako bat, bai orkestrazio apartagatik, bai gaien prestutasun eta monumentaltasunagatik.

NDR Elbphilharmonie Orchestrak eskainiko duen kontzertua ”la Caixa”ren laguntzarekin gauzatuko da, zeina Kursaal Eszenaren kontzertu-programa posible egiten duen enpresa-taldeari batu zaion berriki. Kursaala bere 20.urteurrenean murgilduta dagoen honetan iritsi den bat egite honek, berezko programazio egonkor baten aldeko apostu haundia, ekimen pribatuaren babesik gabe bideragarria izango ez litzatekena, indartzea ekarriko du.

NDR  ELBPHILHARMONIE ORCHESTRA – HAMBURGO
Azaroak 12 / 20:00
Kursaal Auditorioa
55 / 44 / 35 / 28 / 11 €
 Sarrerak erosi

Amaral

AMARALek Kursaalen eskainiko duen kontzertuak data berria du

Gaurkotasuna / 6 azaroa, 2019

Zaragozako taldea apirilaren 18an izango da Donostian,  “Salto al color” izeneko bere azken diskoa aurkezteko

Amaral-en kontzertua, hasiera batetan martxoaren 12rako iragarri bazen ere, azkenean hilabete beranduago izango da; 2020ko apirilaren 18ko larunbatean hain zuzen.

Azken urteetan ikusi ez ditugun bezala, distiratsu, Eva Amaral eta Juan Aguirre “Salto al color” izeneko  lana aurkezteko itzuliko dira Kursaalera. Zaragozako taldeak berak gisa honetan deskribatu du estudiko zortzigarren diskoa duten hau: kolore soinudunezko ozeanoan murgilaldia non zura eta metala, bihotza eta azala, gorputza, arima eta bizitzeko poztasuna bizikide diren”.

Kontzertu honetarako sarrerek prezio bakarra dute, 45 €, eta gaur asteazkena, azaroak 6, hasita, bi eratara eskura daitezke: www.kursaal.eus orria bitarteko (baimendutako online salmenta kanal bakarra) edota Kursaaleko leihatilara hurbilduta.

“Salto al color” irailaren 6an argitaratu zen eta hurrengo egunean bertan bira berria abiatu zen. Amaral-en azken diskoa osatzen duten 13 abestiak eta aurreko diskoetako beste hainbat entzun ahal izango dira birako kontzertuetan zeinetan indarra, konplizitatea, dantza eta emozioa bermatuta dauden.

AMARAL
2020ko Apirilak 18, larunbata / 20:00
Kursaal Auditorioa
45 €

 Sarrerak eroski

 

”la Caixa” eta Kursaal Eszenak bat egin dute eskuragarria den eta edonoren eskura dagoen kultura sustatzeko helburuz

Gaurkotasuna / 5 azaroa, 2019

  • Gizarte Ekintza Deszentralizatuak 118 proiektutan parte hartu zuen Gipuzkoan, pasa den urtean
  • Akordioari esker, Gipuzkoako lurraldeari maila goreneko musika klasikoa zein herrikoia eskaintzen dion kultur-programa zabal eta eskuragarria indartuko da.
  • Datorren azaroaren 12an, Europako musika klasikoaren adierazgarri handienetakoa den Hanburgoko NDR Elbphilharmonie Orkestra Donostian izango da, ”la Caixa” -ren eskutik.
  • Tokian tokiko proiektuen sustapenak ”la Caixa” Banku-Fundazioak inplementatzen dituen gizarte-programak, hezkuntzakoak, kulturaren esparrukoak eta zientifikoak osatzen ditu. ”la Caixa” da Estatuko lehen fundazio pribatua eta 2018an 11 milioi pertsona baino gehiagorentzat izan zen onuragarria.
  • CaixaBank-ek, Gizartearekin Arduratsua den Bankua planaren baitan, eta lan egiten duen inguruko gizarte-beharrak asetzeko, Gizarte Ekintza propioa garatzen du.

Gizakiaren garapen pertsonalean kulturak zerikusi haundia du, eta pertsonarengan ez ezik lurraldearengan ere kulturak izan dezaken eraginaren erakusle da Kursaal Eszenak atondu eta gauzatzen duen kultur-programa. Hau horrela, ”la Caixa” eta Kursaal Eszenak indarrak batu dituzte eta, elkarlanean, bide berria urratzen hasi dira. Lankidetza akordio berri honekin kultura eskuragarria, gipuzkoar ororen eskura dagoena, sustatu nahi da. Izan ere ”la Caixa”k 30 urtetik gora daramatza Gipuzkoako lurraldean, eta gaur egun, lurralde osoan banatutako 44 bulegoek osatzen duten sareari esker, 110.000 gipuzkoar bezero dauzka.

”la Caixa”k Kursaal Eszenaren proiekturarekin bat egin du beraz, proiektu horrek maila goreneko musika-programazioa gipuzkoar ororen eskura jarri eta gerturatzen duen aldetik. Horretarako, nazioarteko ibilbide nabarmena egin duten artistak ekarri ohi ditu Kursaal Eszenak, bai musika klasikoaren esparrukoak bai herri musikari dagozkionak. Hala, datorren azaroaren 12an, Hanburgoko NDR Elbphilharmonie Orkestra Kursaalen izango da, ”la Caixa”-ren eskutik. Azken urteetan europar orkestra ezberdinen artean nabarmendu den formazioa da hau, eta Leonidas Kavakos biolinjole ezagunarekin batera ariko da. Egun horretan, eta ”la Caixa”ko Bolondresei esker, Gipuzkoako Elkarte bat kontzertuaz gozatzera etorriko da Kursaalera.

Lankidetza akordioaren aurkezpen ekitaldian Gaspar Guembek, CaixaBank-ek Gipuzkoan duen Instituzio Zuzendariak, akordioaren garrantzia azpimarratu nahi izan zuen eta Gizarte Ekintzaren lana ere aipatu zuen. “CaixaBank-eko langileek harreman estua dugu gure inguruarekin. Arazo larrienak gertutik ezagutzen ditugu eta baita arazo horiei irtenbide bat emateko lan egiten duten gizarte erakundeak ere. Hau horrela, bitarteko baliotsuak gara ”la Caixa”-ren Gizarte Ekintza bestela ikusezinak izango liratekeen tokietara iristeko eta milaka lagunen bizimodua hobetzeko”, azaldu zuen Guembek eta jarraitu zuen esanez: ”la Caixa” Banku-Fundazioaren aurrekontuaren herena hezkuntzari, ikerkuntzari eta kulturari ematen zaio, gizarte justu eta aurreratu bat lortzeko ezinbestekoak direla erizten bait diogu eta testuinguru honetan ulertu behar da Kursaal Eszenarekin sinatzen dugun akordio hau”.

Kursaal Elkarguneko Zuzendari Kudeatzailea den Iker Goikoetxeak, berriz, ongietorria eman zion ”la Caixa”-ri, Kursaal Eszenaren programa ahalbidetzen duten enpresen taldera batu den honetan, eta gehitze honen garrantzia azpimarratu zuen, aldi berean: “uztardura berri honekin berezko programazio egonkor baten aldeko apostu handia indartzea lortuko dugu. Kursaal Eszena etengabeko erronka da eta ez litzateke bideragarria izango ekimen pribatuaren laguntzarik gabe. ”la Caixa” babes hori indartzera dator oso berezia den une batean, Kursaala bere 20. urteurrenean murgilduta dagoen unean hain zuzen”.

Gizarte Ekintza Deszentralizatua

”la Caixa” Banku-Fundazioak, CaixaBank-eko bulegoak bitarteko zirela, 43,6 milioi euro enplegatu zituen iaz, lekuan-lekuko gizarte-proiektuak babesteko. Euskal Herriaren kasuan, 2018.urtean, 1.376.464€ bideratu zituen, Gipuzkoan 118 ekintza gauzatuz. Gizarte Ekintza Deszentralizatua izenekoak neurri txikikoak izanagatik ere, lan egiten duten lurraldeetan eragin haundia duten proiektuak babesten ditu, gisa honetan, ”la Caixa” Banku-Fundazioak gauzatzen dituen programa haundiak osatuz. ”la Caixa” Banku-Fundazioa Estatuko lehen fundazio pribatua da eta munduko garratzitsuenetako bat, 2019rako 545 milio euroko aurrekontuarekin.

CaixaBank-eko bulego-sareak, bere lurralde ezarpenari esker, ”la Caixa” Banku Fundazioaren gizarte lana babesten du, tokian tokiko beharrak antzemanez eta bere gizarte inbertsioaren zati bat behar horietara bideratuz. Bi instituzio hauen arteko elkarlanari esker, urtero milaka erakunde eta elkarte dira ”la Caixa” Banku-Fundazioaren laguntzak eskura dituztenak. Estatu osoan ia 9.500 erakundek (11.500 proiektuk baino gehiagok) jaso dute bultzada, CaixaBank-eko bulegoek inguruko gizarte-egiturekin duten konpromezuari esker eta ”la Caixa” Banku-Fundazioak gisa honetako ekimenetarako bideratzen duen aurrekontuaz baliatuz.

Kursaal Eszena

Kursaal Eszena, bere 20. denboraldian murgilduta dago oraintxe, kalitatea eta ospea ezaugarri dituen programazio baten onurarako kapital publiko eta pribatuaren arteko konplizitateak duen garrantziaren adierazgarri da. Donostiako Udalak, Gipuzkoako Foru Aldundiak eta orain ”la Caixa” ere barne hartzen duen enpresa taldeak babestuta, kultur bikaintasunak bereizten dituen hogeitamar hitzordutik gora eskaintzen ditu Kursaal Eszenak urtez urte.

Vetusta Morla

Vetusta Morlak kontzertu bikoitza eskainiko du Kursaalen

Gaurkotasuna / 31 urria, 2019

Espainiako indie musikaren talde ikonikoak, eta zuzeneko musikaren berpizkundearen erreferenteetako bat denak, Vestusta Morlak, emanaldi bikoitza eskainiko du Kursaal Eszenaren denboraldi berriaren barruan, bere estudioko bosgarren albuma dela-eta, “Mismo sitio, distinto lugar”. Azaroaren 2ko emanaldirako sarrerak agortuta daude, baina badira oraindik azaroaren 1eko kontzerturako sarrerak.

Talde madrildarraren bosgarren diskoa dena, “Mismo sitio, distinto lugar”, hamar abestiz dago osatua, eta birsortze-eskuliburu bat balira bezala irakur daitezke. Izan ere, bandak bere errealitatea musikaren bidez interpretatzen jarraitzeko duen premiatik datorren birsortzea da, bereizten duen estiloari osorik eutsiz.

2008an bere estreinako diskoa aurkeztu zuenetik, etengabe jaso du seikote honek publikoaren eta kritikaren onespena, Espainian zuzeneko musikaren goraldiaren erreferente bihurtu den arte.

Jauzi kualitatiboa da bere proposamenaren planteamendu eszenografikoan eta azterketa xehean. Esperientzia bakarra balitz bezala zaindu du Vetustak interpretazio bakoitza.

Areto handietako itzuli honetan aurkezten den ikuskizunak euskarri bisual bikain eta sofistikatu bat du, Vetusta Morlako kideak, ezbairik gabe, musikari gisa beren unerik onenean dauden talde baten moduan ikustera bultzatzen gaituena.

Bi kontzertu hauetako sarrerek 45 euroko prezio bakarra dute, eta www.kursaal.eus webgunearen bidez (baimendutako online salmenta-kanal bakarra) eta Kursaaleko leihatiletan eros daitezke.

Vetusta Morla
Ostirala, azaroak 1/20:00
Larunbata, azaroak 2/20:00 (agortuak)
Kursaal Auditorioa

 Sarrerak erosi 

Omara Portuondo

Omara Portuondo Kursaalen izango da bere nazioarteko azken itzuli handiarekin

Gaurkotasuna / 29 urria, 2019

Omara Portuondo, Kubako musikaren ezinbesteko izena, Buena Vista Social Club-eko diva, Tropicanako erregina, filinen neskalaguna, Kursaalen izango da bihar asteazkena, urriak 30, “Omara es Cuba – El último beso” nazioarteko bere azken  itzuli haundiaren baitan.

Omararen birarik intimoena da hau, eta adiskidez inguratuta, bere obra musikal zabalaren hoberena eskainiko du bertan. Omarak bere lurrari kantatu nahi dio: “Kuba deitzen den herrialde batean jaio nintzen, palmondoak, eguzkia, hondar fina, Martí, Maceo, azukre-kanabera, melaoa, guarapoa, kafea, guk egiten dugun kafe guztiz zaporetsu hori den horretan! Musika ere bada Kuba, musikaren bidez adierazten ditugu gure nortasun kulturala definitzen duten elementuetako asko, eta ni nolakotasun horren guztiaren parte naiz”.

Horixe da Omara; apaltasuna xarma bihurtzeko bertute zoragarria, oihal xume bat jantzi fina egitea, kantu bat klasiko errepikaezina gertaraztea. Abesti askoren notak daude haren ahotsean: Adiós, Y Deja, Llanto de Luna, Noche Cubana, La Tierra del Son, Canción de un Festival, Veinte Años, Lágrimas Negras, Es Lo Que Me Queda Por Vivir, Son de la Madrugada, Guitarra en Son Mayor, Drume Negrita, Siboney… “bizitzeko geratzen zaidana irribarrez egingo dut, oinazea ezabatu egin baitut nire bizitzatik”.

Oraingo honetan, Kubako abeslariak ez du atzean orkestra haundi bat izango; laukote bat baizik, piano, baxu, bateria eta perkusioz osatutakoa. Roberto Fonseca pianista birtuosoak laguntzen dio, Omarak musikari handiez inguratu nahi duelako, baina baita bere jendeaz eta konfiantzazko lagunez ere. Eta, horregatik, gonbidatu berezien zerrenda bat ere badu itzuli honek, musikari izarrez gain, beraren parcero, beraren pana, beraren carnal, beraren asere direnak, eta baita moninaren bat ere, Kubako landazabalean betiko lagunei esaten dieten bezala.

Omara es Cuba – El último beso itzuliak abeslariaren obraren hoberena jasotzen du, berdinik gabeko elezahar bat eszenan ikusteko aukera paregabean.

OMARA PORTUONDO
Asteazkena, urriak 30
/ 20:00
Kursaaleko Ganbera Aretoa
40 €

 Sarrerak erosi

IZAROk martxoaren 21ean aurkeztuko du Kursaalen bere hirugarren album-a

Gaurkotasuna / 25 urria, 2019

Bere debut album nabarmenaren (Om, 2016) eta ospetsu bihurtu zuen bigarren diskoaren ondoren (Eason, 2018), kantautore bizkaitarrak 2020ko urtarrilaren 31ean estreinatuko du bere lan berria, “Limones en invierno” izenekoa.

Euskal artista gazte batek sekula ez du lortu hain denbora laburrean “sarrerak agortuta” kartela zintzilikatzea Euskal Herriko musika-tenplu nagusienetan. Artista gazte batek sekula ez du lortu halakorik, kontzeptuari eta estiloari dagokionez hain proposamen zabala den batekin, horrenbesteko emozio eta gustuarekin; bere sormenari inolako aurreritzi edo mugarik jarri gabe. Ingelesa, euskara eta gaztelania erabiliz; pop-a, folk-a, mediterraneoaren itzala edo melodia urratu eta geldoa enplegatuz; bere kontzertuetan hiru belaunaldi ezberdinetako ikus-entzuleak biltzea lortuz….

Orain, “Limones en invierno” lanarekin, kolore, usain, tenperatura eta kontraste kitzikagarriak agintzen dizkigu Izarok. Disko berriak egun eguzkitsuak argitzen dituzten argi zitrikoak jasotzen ditu, baina baita neguko errekak estaltzen dituzten behe-lainoak ere. Eta ez dizuegu ezer gehiago kontatuko…

“Limones en invierno”, 2020ko urtarrilaren 31ean, Ciudad de Mexicon aurkeztuko da eta jarraian Latinoamerika eta Espainian barna bira luzea egingo da. Aipatu birak 2020ko martxoaren 21ean egingo du Kursaalen geldialdia.

Kontzertu honetarako sarrerek prezio bakarra dute, 25 €, eta bihar hasita eskuratu ahal izango dira (ostirala, urriak 25, 11:30etatik aurrera), www.kursaal.eus orria bitarteko (baimendutako online salmenta kanal bakarra) edota Kursaaleko leihatilara hurbilduta.

IZARO: “Limones en invierno”
Martxoak 21, larunbata / 20:00
Kursaal Auditorioa
25 €

 

Gaur egun Kursaal jauregia dagoen oruberako aurkeztutako proiektu ugarien errepasoa egiten du Solar K erakusketak

Gaurkotasuna / 24 urria, 2019

 Rafael Moneoren eraikina inauguratu zenetik 20 urte betetzen direla ospatzeko, Euskal Herriko Unibertsitateko Arkitektura Eskolako irakasle eta ikasleek erakusketa bat antolatu dute gaur egun jauregia dagoen oruberako aurkeztutako proiektu guztiekin.

 Denboraren joanean, 1964tik 1989ra bitartean, hiru lehiaketa antolatu ziren, eta arkitektura-talde ugarik 135 proposamen aurkeztu zituzten guztira.

 Gaur egungo Kursaalak sekulako kalapita piztu zuen gure artean, “Belle Époque betikoaren irudi izoztua defendatzen zutenen eta Donostia kultur hiri moderno bihurtu nahi zutenen artean”.

Donostiako Kursaalak ateak ireki zituela 20 urte betetzen ditu aurten. Rafael Moneoren proiektua Gipuzkoako hiriburuaren ikonoetako bat da gaur egun, baina eztabaidaz eta istiluz jositako bide luze bezain malkartsua egin behar izan zuen denek onar zezaten. Euskal Herriko Unibertsitateko Arkitektura Goi Eskola Teknikoko irakasle- eta ikasle-talde batek 25 urte iraun zuen prozesu haren errepasoa egin nahi izan dute, urteen joanean antolatutako hiru lehiaketetara aurkeztu ziren 135 proiektuak gogora ekarriz.

MUGAK Euskadiko Nazioarteko Arkitektura Bienalak prestatutako programazioaren barruan ikusi ahal izango da erakusketa, eta urriaren 23tik abenduaren 8ra bitartean egongo da zabalik, Kursaal jauregiko hallean. Erakusketa 11.00etatik 14.00etara egongo da zabalik, ostiraletik igandera bitartean (urriak 15 izan ezik), bai eta denbora-tarte horretan ekitaldiren bat antolatzen duten guztietan ere.

Antolatzaileen esanetan, “erakusketa ez da kontakizun historiografiko bat (…), gertaturikoari buruzko datuz eta azalpenez josia”; aitzitik, “toki horretan zer eraiki erabakitzeko zenbait arkitekto-taldek denboraren joanean aurkezturiko proposamen onenen ibilbide bisual eta neutroa egitea da asmoa”. Ikerketa-lana Mario Sangalli doktore, arkitekto, Euskal Herriko Unibertsitateko irakasle eta Peña Ganchegui Artxiboko kideak zuzendu du. Ikerketa-taldea, berriz, honako ikertzaile hauek osatu dute: Felipe Aurtenetxe, Ana Azpiri, Diego Rodríguez eta Iñigo Viar ikertzaileek, eta Paúl Campo, Ander Guerra, Adrián López eta Laila Medina ikasleek.

Erakusketan, jakina, Rafael Moneok sortu eta orain 20 urte inauguratutako Kursaal jauregiaren proiektua ikusi ahal izango da, bai eta 20 maketa ere, 1/500 eskalan, ordena kronologikoan jarriak, lekuz kanpo, inolako testuingururik eta zirkunstantziarik gabe. Garbi, zuri, abstraktu. Arazo berberari emandako soluzio formalen sekuentzia modura aurkezten dira maketak. Sekuentzia itxiz, orubea bete zuen aurreneko eraikina erakusten da.

Erakusketan, ospe handiko arkitektoen proiektuak ikus daitezke: 1996an Pritzker saria jaso zuen Moneoren proposamenaz gain, hortxe daude, gure gozamenerako, Mario Botta, Norman Foster, Arata Isozaki, Juan Navarro Baldeweg eta Luis Peña Ganchegui, José Antonio eta Mateor Corralesek osatutako taldeak hirugarren lehiaketan (egin zen azkenekoan, alegia) aurkeztu zituzten proiektuak.

Aurreneko lehiaketa, sasoi hartan EuroKursaal deitzen ziotena nori esleitu erabakitzeko antolatua, 1964. eta 1965. urteetan egin zen, eta orduko proiektuak ere ikusgai daude erakusketan: luxuzko hotelak, etxebizitzak, zinema-aretoak, estalitako igerilekuak, bainu-etxeak, bulegoak, jatetxeak, patinaje-pistak, galeria komertzialak… Jan Lubicz-Nycz britainiarrak, Carlo Pelliccia italiarrak eta William Zuk iparramerikarrak osatutako taldeak irabazi zuen aurreneko lehiaketa hura. Oro har, “sasoi hartako potentzia espresionista itzela” igartzen zaie proposamen guztiei.

Bigarren lehiaketa, Kursaal Handia egiteko lanak nori esleitu erabakitzeko antolatua, 1972tik 1975era bitartean egin zen, eta garai hartan aurkeztutako proiektuen artean ere, tartean ziren luxuzko hotelak, etxebizitzak, garajeak, kongresu-aretoak, igerilekuak, gimnasioak, bulegoak eta jatetxeak. José Antonio Corrales eta Ramón Vázquez Molezún arkitektoek irabazi zuten lehiaketa, Francisco Javier Sáenz de Oiza handiari gailenduta. Bigarren lehiaketa hartan, proposamenak “hiritarragoak” izan ziren, ete denek ere “hiri-zabalgune bateko lursail bat nola bete erabakitzeko zenbait eredu” proposatzen zituzten.

Azkeneko lehiaketa 1989koa dugu, eta erakusketaren antolatzaileen arabera, orduko hartan Moneorena izan zen “lekuaren azterketa egokiena” proposatzen zuen proiektua. Haien esanetan, Moneoren proposamenean, batetik, eraikina “itsasoa aurrez aurre duen ikono autonomoa da”, baina horrekin batera, bestetik, “bertute handi bat ere badu: hiria zerbitzatzea, hiriari behar zituen hornikuntzak eskaintzea”.

Rafael Moneo eta Iñaki Gabilondo aurrez aurre

Hurrengo azaroaren 28an, arratsaldeko 18.00etan, Rafael Moneo arkitektoa eta Iñaki Gabilondo kazetaria elkarrekin solasean jarriko ditugu Kursaaleko Ganbera Aretoan, eta besteak beste, Kursaalak hiriko ekonomiari nola eragin dion eta ingurua nola eta zenbateraino aldatu duen hartuko dute hizpide, eta horrez gainera, eraikinaren bilakabideaz eta premia eta teknologia berrietara egokitu den moduaz ere arituko dira solasean.

Solasaldira joateko izena eman nahi duenak, urriaren 24tik aurrera izango du horretarako aukera Kursaalaren web-orrian. Ganbera Aretoko besaulki-patioa betetzen baldin bada, gonbidapena dutenek aldamenean dagoen aretoan bertan ikusi ahal izango dute topaketa streaming bidez.

Enpleguaren Nazioarteko II. Kongresuaren eta Merkalan Enplegurako eta Heziketarako I. Azoka inauguratua

Gaurkotasuna / 21 urria, 2019

    • Beatriz Artolazabal: “prestakuntza handiagoa izatea eta hizkuntzak ezagutzea gure gazteen enplegagarritasunerako aukerarik onenak dira”
    • Eneko Goia alkatearekin eta Markel Olano Diputatu Nagusiarekin batera, Enpleguaren Nazioarteko II. Kongresuaren eta Merkalan Enplegurako eta Heziketarako I. Azokaren irekiera-ekitaldian parte hartu du
    • Gaur eta bihar, Donostia-San Sebastiángo Kursaal Biltzar jauregian
    • Bavariako eta Trentoko enplegu-ereduen analisia

Beatriz Artolazabal Eusko Jaurlaritzako Enpleguko eta Gizarte Politiketako sailburuaren iritziz, “gazteentzat prestakuntza handiagoa izatea eta hizkuntzak ezagutzea enplegagarritasunerako aukerarik onenak dira”. Eneko Goia alkatearekin eta Markel Olano Diputatu Nagusiarekin batera, Artolazabalek Enpleguaren Nazioarteko II. Kongresuaren eta Merkalan Enplegurako eta Heziketarako I. Azokaren irekiera-ekitaldian parte hartu du. Jardunaldia gaur eta bihar izango da, Donostia-San Sebastiángo Kursaal Biltzar jauregian.

“Gure programa bat dator Europar Batasunak ezarritako orientabideekin, eta gure lan-oinarria honako hau da: zenbat eta prestakuntza gehiago, orduan eta enplegu gehiago eta kalitate handiagokoa. “Kalitateko enpleguarekin konprometituta” da nazioarteko bigarren kongresu honen eta Merkalan azokaren inguruan batzen gaituena; azken hori Lanbideren, enpresen eta beren lana hobetu nahi duten pertsonen artean kontratazioak, aholkularitza eta hurbiltasuna dinamizatzeko gure ekimen berria da”, esan du Artolazabalek.

Artolazabal sailburuak esan duenaren arabera: “Enpleguko eta Gizarte Politiketako Sailak eta Lanbide – Euskal Enplegu Zerbitzuak ahaleginak batu ditugu, ekimen hau batera aurkezteko; horretarako, Europako beste leku batzuetan garatutako jardunbide egokiak ezagutuko ditugu. Batzuek adierazitako gehiegizko trebakuntza eta besteek antzemandako eskulan gaiturik eza direla eta, gure analisiek erakusten dute gazteentzat prestakuntza handiagoa izatea eta hizkuntzak ezagutzea enplegagarritasunerako aukerarik onenak direla”.

Eneko Goia Donostiako alkateak adierazi duenez, “Euskadi erreferentzia da Europan eta mundu osoan prestakuntza dualean, ikaskuntza eta lan-esperientzia bateratzen dituen Lanbide Heziketan”. Bere ustez, “Euskadiko esperientziak erakusten du ongi planifikatuta, lan-merkatuaren benetako premietara bideratuta eta Administrazioaren, enpresen eta erakunde akademikoen arteko elkarrizketan eta lankidetzan oinarrituta dagoen ekintza instituzionala dela belaunaldi berriak lan-merkatuan sartzeari buruzko indizeak igotzeko errezeta”.

Markel Olano Gipuzkoako diputatu nagusiak aipatu du “maila guztietan eta erabakigarritasun osoz kalitatezko enplegua sustatzen jarraitu” behar dela, “nazioartean ekonomiaren egoera zalantzazkoa den honetan”.

Alde horretatik, Olanok Administrazioaren eta enpresen arteko lankidetzaren emaitza den Merkalan azokak eta antzeko ekimenek egiten duten ekarpena baloratu du. “Gipuzkoan pertsona guztiek euren bizi-proiektua eraiki ahal izatea nahi dugu, Gipuzkoa etorkizuneko lurraldea izatea nahi dugu. Horretarako, funtsezkoa da denon artean kalitatezko enplegu-aukerak sortzen laguntzea, batez ere gazteentzat”, adierazi du diputatu nagusiak, eta gogoratu du Foru Aldundia “kalitatezko enplegua eta etorkizuneko industria-sektoreak” sustatzera bideratutako beste plan bat lantzen ari dela.

Talentua

“Ezegonkortasun-egoeraren aurrean, kalitateko enpleguak alde guztientzat dira onuragarriak azkenean, eta, haien bidez, gure historiako prestakuntza-maila handiena duten gure gazteen belaunaldien talentuari eustea lortzen da. Kongresuko bi jardunaldi horien bidez, beste errealitate batzuekin erkatu ahalko gara”.

Topaketan parte hartuko duten aditu guztiei ongi etorria eman ondoren, Artolazabalek honako hau nabarmendu du: “Merkalanen lehen azoka harreman-zubi bat da, eta 700 lanpostu baino gehiago eskaintzen ditu; horrela, Lanbide –  Euskal Enplegu Zerbitzuaren bilakaeraren sintoma bilakatzen da, zeina modernizatzen ari baita, enplegagarritasunaren eragile sustatzaile gisa, eta antzinako langabezia-bulegoen sinonimo izateari utzi baitio”.

“Lanbide gero eta eskuragarriagoa da, eta herritarrengandik hurbilago dago, arreta integrala eta pertsonalizatua emateko. Krisialdiaren eta haren langabeziaren ondoren, legegintzaldi honen helburu garrantzitsuena, Eusko Jaurlaritzarentzat eta euskal gizarte osoarentzat, langabezia-tasa % 10etik behera jaistea izan da, eta hori, dagoeneko, lortu egin da. Hori bai, nazioarteko zalantzazko egoera dela eta, erne gaude”, esan du Beatriz Artolazabalek. Sailburuak berretsi egin du “pertsona guztientzako eta, bereziki, gure gazteentzako kalitateko enpleguarekin” duen konpromisoa.

Enpleguaren II. Nazioarteko Kongresua eta 2019ko “Merkalan” Enplegurako eta Heziketarako I. Azoka Eusko Jaurlaritzako Enpleguko eta Gizarte Politiketako Sailak antolatu ditu. “’Merkalan’ azokak enplegu-eskatzaileei 70 enpresa parte-hartzailek eskaintzen dituzten sektore eta trebakuntza guztietako 700 lanpostu baino gehiago erakutsiko dizkie”.

Jardunaldietan, honako hauek izango dira: Marcos Muro Eusko Jaurlaritzako Enplegu eta Gazteriako sailburuordea, Borja Belandia Lanbideko zuzendari nagusia eta Amaia Arteaga, Marta Etxebarria, Ion Uriarte eta Nestor Arana arloko zuzendariak.

Programa

Franck Morel Gizarte Harremanetarako, Lanerako, Enplegurako eta Lanbide Heziketarako Frantziako lehen ministroaren kontseilariak inaugurazio-hitzaldia eman du:Frantziak kalitateko enpleguarekin duen konpromisoa”. “Kalitateko enplegua sortzeko erronkak eta aukera globalak” aztertu dituzte Jamie Winders Syracuseko Unibertsitateko Autonomous Systems Policy Institute-ko zuzendariak, Christopher Markou Cambridgeko Unibertsitateko Zuzenbide Fakultatekoak eta Albert Cañigueral Ouishareren sortzaileetako batek.

Europar Batasunaren kalitateko enpleguaren estrategia” aztertu du Loukas Stemitsiotis Europako Batzordeko Enpleguko, Gizarte Gaietako eta Inklusioko Zuzendaritza Nagusiko Analisi Tematikoen zuzendariak. Maurizio Bussi LANEko Europako eta Asiako Erdialdeko Eskualdeko zuzendari ondokoak “Kalitateko enpleguaren estrategia globala”z hitz egingo du gaur, eta Alexander Hijzen ELGAko Enplegu Estrategiaren zuzendariak “ELGAren kalitateko enpleguaren estrategia” azalduko du. Gaur arratsaldean, bertaratzen direnek “Tknika” Euskadiko LHko Ikerketako eta Berrikuntza Aplikatuko Zentroa bisitatuko dute, Errenterian.

Asteartea

Bihar, asteartean, hilaren 22an, Markus Zorzi Bavariako Gobernuko Familiako, Enpleguko eta Gizarte Gaietako Ministerioaren Plangintzako, Estrategiako, Gai Juridikoetako eta Komunikazioko zuzendari nagusiak “Bavariako kalitateko enpleguaren estrategia” azalduko du. Laura Pedron Trentoko Probintzia Autonomoko Enplegu Agentziako zuzendari nagusiak bere kalitate-estrategia azalduko du eta Gary Shaughnessy Z  Zurich Foundation-eko presidentea “Zerbitzuen sektorean kalitateko-enplegua sortzea”z mintzatuko da.

Enpresaren eredu inklusibo eta parte-hartzailea azalduko dute Deb Oxley Employee Ownership Associationeko CEOak eta Juan Manuel Sinde Arizmendiarrieta fundazioko presidenteak. Marcos Muro Eusko Jaurlaritzako Enplegu eta Gazteriako sailburuordeak itxiko du Kongresua.

Lanbidek, Kursaal Jauregian, Merkalan enplegurako eta heziketarako azokaren lehen edizioa antolatuko du, kontratatzeko beharrak dituzten enpresen eta aktiboki enplegua bilatzen ari diren pertsonen arteko harremana sustatu eta bideratzeko. Esparrua 1.000 metro koadrotik gorakoa izango da, eta, haren diseinuan eta edukietan, Lanbideren zerbitzuak erabiltzen dituzten pertsonen behar bereziak izan dira kontuan.

Azokako espazioen banaketa ohiko lan-ibilbide gisa antolatu da: standek arlo tematikoak eta Lanbideren bulego-sareak herritarren esku enplegagarritasuna hobetzeko erabakiak hartzen laguntzeko jartzen dituen banako baliabide guztiak erakutsiko dituzte (enplegu-eskari baten alta, lan-orientazioa, prestakuntza, profesionaltasun-egiaztagiriak, enpresentzako zerbitzuak, ekintzailetza etab.).

“ASKE!”, Jaso ikastolaren zazpigarren musikalak Kursaalen eskainiko du bira amaierako emanaldia

Gaurkotasuna / 18 urria, 2019

Ikastolako ikasleek sortua, familia osoarentzako den ikuskizun honek aniztasun sexuala du gai nagusitzat.

 “Aske!” euskarazko musikala Kursaalera iritsiko da datorren larunbatean, urriak 19an. Aniztasun sexualaren trataera gai nagusitzat hartuta, Jaso Ikastolak proposatzen duen endredo komedia da hau. Istorioak, pertsonaiek eta haien inguruak bizi duten bidai psikologikoan zehar eramango gaitu; norberaren identitate eta onarpen prozesuaren bidaian, hain zuzen ere.

Onarpen eta aniztasun sexualaren mezua zabaltzeko asmoarekin sortutako musikal honek, gazte desberdinen istorioa kontatzen digu. Izan ere, protagonisten hitzetan “pertsonai bakoitzak badu bere barne istorioa eta beraien eboluzioa ikusiko da”. Beldurrei aurre egitea izango da haien erronka nagusietako bat, eta, batez ere, haien ingurukoek bizi duten itsutasuna argitzea; hauek, itsutasuna sistema patriarkalaren ondarea den legez, ez baitira gazte hauek bizi dituzten barne borrokak onartzeko gai.

Kantuak, dantzak, akrobaziek eta efektu bereziek bat egingo dute ordu bete eta 25 minutuko iraupena duen ikuskizun honetan. “Aske!” Jaso Ikastolako ikasleek prestatu eta egin duten zazpigarren sorkuntza da; Imanol Janices, Irantzu Zabalza eta Nerea Martínez irakasleak izan dituzte langintza horretan zuzendari eta gidari.

50 ikasleek osatzen dute lan taldea eta beraiek dira sorkuntza lanaz gain eszenaratzeko lan guztiak egiteaz ere arduratzen direnak. Gidoiaren sorkuntza, koreografien sorkuntza, argien diseinua, soinuaren diseinua, eszenografiaren sorkuntza, jantzien diseinua, muntaia… Gauzak honela, diziplina, lan taldea, motibazioa eta batez ere, lagunartekoa, lantzen dute. Ikasleek beraiek azaldu dutenez, “elkarlana eta beste kurtsoko ikasleekin harremantzea izan da hoberena”. Ideia honen harira, Imanol Janices zuzendariak honela dio: “musikalak ikastolako giroa hobetu du, izan ere, musikalean parte hartzen duten gazteek lotura bihurtzen dira. Dena den,  musikalaren helburua nagusia euskara sustatzea da eta euskara gazteei modu moderno batean hurbiltzeko moduak badaudela erakutsi nahi dugu”.

Kursaaleko ikuskizuna birako azkena izango da eta honen aurrean sentimendu kontrajarriak dituzte gure protagonistek: “gogo handiz datoz Kursaalera, baina pena handiz ere azken saioa delako”. Dena den, hasiak dira zortzigarren musikalaren prestaketa lanetan.

ASKE! MUSIKALA
Urriak 19 larunbata / 18:00
7 € / 3 € (<12 urte)
Euskaraz (6 urtetik aurrera)

 Sarrera erosi

Vetusta Morla

Vetusta Morla taldeak data berria gehitu dio Kursaalera egingo duen bisitaldiari

Gaurkotasuna / 4 urria, 2019

Estatuko indie musikaren ikonoa den Vetusta Morla taldeak bi kontzertu eskainiko ditu Kursaal Eszenaren denboraldi berrian, euren estudioko bosgarren lana, “Mismo sitio, distinto lugar” izenekoa, aurkezteko helburuz.

Hasiera batean iragarritako datari, azaroak 2, hitzordu berri bat erantsi zaio orain, hain zuzen ere egun bat lehenago: azaroak 1, ostirala, 20:00.

Bi kontzertu hauetarako sarrerek prezio bakarra dute, 45 €, eta bi eratara eskura daitezke: www.kursaal.eus orria bitarteko (baimendutako online salmenta kanal bakarra) edota Kursaaleko leihatilara hurbilduta.

Madrilgo taldearen bosgarren diskoa, “Mismo sitio, distinto lugar”, hamar abestik osatzen dute eta kantu hauek taldearen birsortze eskuliburutzat har daitezke; zintzotasun ukaezinaren ezaugarria bere horretan mantenduz, Vetusta Morlak errealitatea musikaren bidez interpretatzeko duen beharretik sortzen den gidaliburutzat hain zuzen.

VETUSTA MORLA
Azaroak 1, ostirala / 20:00 (data berria)
Azaroak 2, larunbata / 20:00
Kursaal Auditorioa
45 €

Omara Portuondo

Dozena bat kontzertu antolatu ditu Kursaal Eszenak ospakizun kutsuko denboraldirako

Gaurkotasuna / 9 iraila, 2019

 

  • Azaroaren 28an, Kursaalek bere 20. urteurreneko gala ospatuko du, besteak beste Euskadiko Orkestra, Lucía Lacarra dantzaria eta Izaro, Mikel Erentxun eta Eñaut Elorrieta abeslarien partehartzearekin.
  • Urteurren hau dela eta, Kursaal Eszenak Hastapen Abonua jarri du abian, bereziki hautatuak izan diren musika klasikoko 3 kontzertuk osatzen duten abonua.

 

  • Geneva Camerata, Hamburgoko NDR Elbphilharmonie, Martha Argerich, Concerto Köln eta Javier Camarenaren kontzertuek osatuko dute musika klasikoko eskaintza

 

Omara Portuondo, Vetusta Morla, Ludovico Einaudi eta Los Secretos taldeak ere arituko dira urriaren 19tik urtarrilaren 31ra bitartean gauzatuko den  Kursaal Eszenako denboraldi berrian

 

Kursaal Eszenak hamabi hitzordu dakartza Kursaalaren 20.urteurrenarekin bat egiten duen denboraldi berrirako. Aipatu urtemuga azaroaren 28an ospatuko da, hain zuzen, Kursaal 20 urte Gala ekitaldiarekin. Emankizun berezi honetan eraikineko urteko jarduera bildu eta ordezkatzen duten hainbat artista arituko dira, besteak beste, Euskadiko Orkestra Juan José Ocón zuzendariaren gidaritzapean eta Orfeoi Gazte-rekin batera; Lucía Lacarra dantzaria; Elena Sancho Pereg sopranoa, eta Izaro, Mikel Erentxun eta Eñaut Elorrieta abeslariak.

Denboraldiko lehen hitzordua urriaren 19an izango da, haurrentzako apropos atondutako Musika Familian programazioko ikuskizun batekin. Bukatu berriz, 2020ko urtarrilean bukatuko da, Javier Camarena abeslari liriko entzutetsuaren errezitaldiarekin (urtarrilak 23), eta Madrilgo Los Secretos talde mitikoaren kontzertuarekin (urtarrilak 31).

Musika klasikoko esparruak urriaren 27an urratuko du bidea, proposamen berezi batekin: Geneva Camerata, David Greilsammer-en zuzendaritzapean, Juan Kruz Díaz de Garaio koreografo eta dantzariarekin batera ariko da, guztiz berritzailea eta hipnotikoa den kontzertu/ikuskizuna gorpuzteko: taula gainean 30 musikari inguru euren instrumentuak jotzen eta batera zein bestera mugitzen; publikoak berriz, Lullyk idatzitako musikaren argi-ilunetatik, Mozarten 40. sinfoniaren espiritualtasun, pasio eta edertasunera garamatzan musika-bidaia egin ahal izango du.

Hamburgoko NDR Philharmonie orkestrak eskainiko du hurrengo kontzertua, azaroaren 12an. Duela bi urte Musika Hamabostaldian arrakasta itzela lortu zuen formazioa Leonidas Kavakos Greziako biolinista karismatikoarekin ariko da, oraingo honetan, Bartoken biolinerako 2. kontzertua interpretatzeko. Bruckner-en sinfonia ezagunenetako batek osatuko du programa, 7. sinfoniak.

Martha Argerich pianoaren dama handia izango da Kursaalera heltzen hurrengoa (azaroak 23), herrialde baltikoetako musikari gazteek osatzen duten Kremerata Baltica ganbera orkestrarekin batera. Concerto Köln ganbera taldeak, ostera, Mayumi Hirasaki kontzertino japoniar ezagunaren gidaritzapean, barroko garaiko konpositore garrantzisuenen obrak interpretatuko ditu: Vivaldi, Telemann eta Corelli-ren sormen lanak, besteak beste (abenduak 14).

Nazioartean ezaguna eta txalotua den Javier Camarena abeslari lirikoaren errezitaldiarekin bukatuko da Kursaal Eszenaren denboraldi berriko musika klasikoko egitaraua (2020ko urtarrilak 23). 2016an, Kursaal Auditoriora egindako lehen bisitaldian, publikoaren onespena jaso zuen tenor mexikar ezagunak, Ángel Rodriguez pianoan lagun duela esakiniko du oraingoan errezitaldia.

Bestelako musiken atalari dagokionez, Kubako musikaren ezinbesteko izenetako bat etorriko da  denboraldi honetan Kursaalera, Omara Portuondo. “Omara es Cuba – El Último Beso” bere azken bira handiarekin dator. Eszenatokian, eta beste hainbat musikariren artean, Roberto Fonseca pianista birtuosoa izango du lagun (urriak 30).

Kubako izarrari Vetusta Morla taldeak hartuko dio lekukoa. Azaroaren 2an itzuliko da Kursaalera, estudioan grabatutako “Mismo sitio, distinto lugar” bosgarren diskoarekin.

 Era berean, Kursaal Eszenaren denboraldi berrian izango da Ludovico Einaudi pianista (azaroak 4). Kontzertu honetarako sarrera gehienak maiatzean agortu ziren, salmenta abian jarritakoan. Zinemarako egin dituen konposizioengatik ere ezagun den Einaudik bere azken proiektua aurkeztuko du: “Seven Days Walking”.

Atal honi bukaera emango dion taldea Los Secretos izango da, urtarrilaren 31n. Espainiako pop-rock musikaren historiako talde garrantzitsuenetako bat da, baita klasiko bihurtu diren hainbat kanturen egile ere: “Déjame”, “Sobre un vidrio mojado”, “Quiero beber hasta perder el control” eta “Pero a tu lado” abestienak besteak beste. Hamalaugarren lana aurkeztuko du boskoteak: “Mi Paraíso”.

Musika Familian, haurrentzako apropos atondutako programazioak, bi ikuskizun ezberdin hartuko ditu: “Aske!” Musikala, non Aske Fundazioak sexu aniztasunaren gaia eszenaratzen duen endredozko komedia musikal batekin (urriak 19).

Azaroaren 30ean, berriz, etxeko txikienek “Route 6.6”  ikuskizunarekin gozatzeko aukera izango dute. Istorio honetako protagonistek osaba zenaren gitarra elektrikoa jaso dute oinordetzan, zeinak alde batetik bestera bidaiatu baitzuen instrumentu harekin. Gitarraren harietako bakoitzak gordetzen duen esperientzia biziberrituko dute istorioko lagunek, hala leku berrietara bidaiatuz, musika ona entzun eta ipuin ederrak ezagutuz: 6 hari, 6 ipuin.

 

Egitarau berri honek uztailean bukatu zen denboraldia osatzen du. 2019ko lehen zazpi hilabeteetan hamabi kontzertu eskaini zituen programazio hark, eta 20.828 pertsona hartu zituzten ikuskizunek orotara.

Hurrengo denboraldiko kontzertuen aurrerapena

Aipatu hamabi kontzertuez gain, Kursaal Eszenaren 2020ko denboraldiko hitzorduetako biren sarreren salmenta ere abian jarriko da.

Opera izango da horietako bat: Opus Lirica konpainiak Mozarten “Don Giovanni” ezaguna eszenaratuko du, otsailaren 21ean eta 22an. Gaurtik eskuragarri dira halaber Amaral taldeak martxoaren 12an emango duen kontzerturako sarrerak; “Salto al color” disko berria aurkeztuko dute.

KURSAAL ESKURA

Kursaal Eszenak, denboraldi honetan ere, aurrera egingo du Kursaal Eskura proposamenarekin; Donostiatik urrutien dauden gipuzkoar udalerrietatik datozen zaleei Kursaalera etortzea errazteko asmoz.

Antzuola, Arrasate, Bergara, Elgoibar, Getaria, Ezkio, Itsaso, Legazpi, Urretxu, Oñati, Tolosa, Zarautz, Zumaia, Zumarraga eta Irungo entzuleek izan dute jadanik ekimenaz gozatzeko aukera, Kursaal Eszenak antolatutako kontzertuetan, eta laster beste udalerri batzuek ere proiektu honetan parte hartzea espero da.

Kursaal Eskura 2014. urtean sortu zen, Kursaal Eszenaren eta Gipuzkoako zenbait udalen elkarlanaren bidez. Doako autobus-zerbitzu bat jartzen du zaleen esku, udalerri horietatik abiatzen dena, eta, Kursaaleko kontzertua/ikuskaria amaitzen denean, jatorrizko abiapuntuetara itzultzen dena.

 

 

ABONUAK ETA SARRERAK

Abonuen eta sarreren salmenta  gaur hasiko da, irailak 9, 12:00etan, Kursaleko leihatilan (astelehenetik ostiralera 11:30etik 13:30era; ostegun eta ostiraletan baita 17:00etatik 20:00etara; larunbatetan 17:00etatik 20:00etara) edota Kursaaleko webgunean (www.kursaal.eus). Gogoan izan helbide hau dela sarrerak online erosteko baimenduta dagoen kanal bakarra.

 

Musika klasikoko abonua erosteko azken epea urriaren 27a izango da. 5 kontzertutarako abonua da (Geneva Camerata, NDR Elbphilharmonie Orchestra, Kremerata Baltica & Martha Argerich, Concerto Köln, Javier Camarena). Sarrera arrunten aldean, abonua erosteak prezioaren %20a aurreztea dakar, baita bestelako abantailak ere.

 

Aurten, Kursaalaren 20. urteurrena baliatuta, Hastapen abonua ere jarri du abian Kursaal Eszenak, musika klasikoko 3 kontzertuk osatua (NDR Elbphilharmonie, Concerto Köln, Javier Camarena). Abonu hau orkestra sinfoniko baten handitasuna, musika barrokoaren gailurra eta egungo panorama lirikoko kantari nabarmenenetako bat zuzen-zuzenean ezagutu nahi dutenentzat bereziki prestatuta dago. Sarrera arrunten aldean, Hastapen abonua erosteak prezioaren %15a aurreztea dakar. Kursaal Eszenako abonatu berriek eskuratu ahal izango dute soilik abonu berezi hau, azaroaren 12ra arte.

Arkitekturako bi Pritzker saridun egongo dira MUGAK Bienalean: Rafael Moneo eta Álvaro Siza

Gaurkotasuna / 30 abuztua, 2019

 Arkitekto nafarra azaroaren 28an egongo da gurean, Kursaal jauregia inauguratu zenetik 20 urte bete direla ospatzeko, eta solasean arituko da Iñaki Gabilondo kazetariarekin. Hori gutxi ez, eta erakusketa bat ere inauguratuko da Moneoren eraikinean, Arkitektura Eskolak antolatua, gaur egun Moneoren beirazko bi prismak dauden orubean, Solar K delakoan, zer eraiki erabakitzeko 25 urtez eginiko proposamenak erakusten dituena.

Álvaro Siza arkitekto portugaldarra urriaren 31an San Telmo Museora etorriko da, Peña Ganchegui Artxiboaren eskutik, eta Carles Muro arkitektoarekin elizen diseinuan egin duen ibilbide oparoaz hitz egingo du.

Urriaren 10etik abenduaren 12ra bitartean, MUGAK-ek ehunetik gora jarduera antolatu ditu. Donostian ez ezik, Bilbon eta Gasteizen ere hainbat ekitaldi izango dira.

 MUGAK Euskadiko Nazioarteko Arkitektura Bienalak luxuzko bi gonbidatu izango ditu aurtengo udazkenean: Rafael Moneo eta Álvaro Siza, Europako arkitekto aintzatetsienetako bi.

Hurrengo azaroaren 28an, aurten Kursaal jauregia inauguratu zenetik 20 urte betetzen direla ospatzeko, Rafael Moneo arkitektoa eta Iñaki Gabilondo kazetaria elkarrekin solasean jarriko ditugu Kursaaleko Ganbera Aretoan. Kursaal jauregia Moneoren lanik entzutetsuenetako bat da, eta hari buruz hitz egingo dute arkitekto nafarrak eta kazetari donostiarrak; besteak beste, Kursaalak hiriko ekonomiari nola eragin dion eta inguruan zer-nolako eragina izan duen hartuko dute hizpide, eta horrez gainera, eraikinaren bilakabideaz, hiriez, herritar izateaz eta bizitzaz ere arituko dira solasean. Izena eman nahi duenak, azaroan bertan izango du horretarako aukera, Kursaalaren web-orrian.

Arkitekto nafarrari 1996an eman zioten Pritzker saria, eta bera izan zen sari hori jaso zuen aurreneko arkitekto espainiarra. Moneok Madrileko Arkitektura Goi Eskola Teknikoan (ETSAM) ikasi zuen, Francisco Javier Sáenz de Oiza arkitektoarekin hainbat proiektutan lan egin ondoren. 60ko hamarkadan, Danimarkan jardun zuen lanean Sydney Opera House famatuaren egile Jørn Utzon arkitektoaren estudioan. Irakasle ere aritu da Moneo, Princeton, Harvard eta izen handiko beste unibertsitate batzuetan. Jaso dituen sari ugarien artean, ezin aipatu gabe utzi Arteen Asturiasko Printzea saria eta arkitekturako Mies van der Rohe saria, Donostiako Kursaal jauregiagatik eman ziotena. Azaroan itzuliko da Moneo hain arrasto sakona utzi duen hirira, Donostiara (Kursaal jauregiaz gain, hortxe daude Urumea eraikina, Iesu eliza eta Donostiako Elizbarrutiko museoa, denak ere Moneok eginak).

Kursaal jauregiko solasaldia gutxi ez, eta erakusketa bat ere inauguratuko da Moneoren eraikinean, Euskal Herriko Unibertsitateko Arkitektura Ekolako irakasle- eta ikasle-talde baten ikerketa-lan batean oinarrituta. Erakusketan, gaur egun Kursaal jauregia dagon orubean, Solar K delakoan, Moneok hura proiektatu eta eraiki aurreko 25 urteetan zer eraiki erabakitzeko antolaturiko lehiaketetan aurkezturiko proposamen onenen ibilbide bisual aparta egiten da.

Siza eta hiru elizak

1992ko Pritzker saridun Álvaro Siza urriaren 31n etorriko da Donostiara, Três Igrejas topaketan parte hartuko du. Topaketa Peña Gantxegi Artxiboak antolatu du MUGAK-en bidez, eta horretan, laguntzaile izan du Eusko Jaurlaritza.

Arkitekto portugaldarrak Milango Unibertsitate Politeknikoko irakasle eta Portoko Serralves Museoko komisario Carles Muro izango du solaskide. MUGAK-eko egoitzetako bat den San Telmo Museoan egingo den topaketan, arkitektura erlijiosoaz duen ikuspegia azaldu eta berak diseinaturiko hiru eliza aurkeztuko dizkigu Sizak: elizetako bat Frantzian dago, Rennes-en, eta beste biak Portugalen, Marco de Canaveses-en eta Barão de São João-n.

Álvaro Sizak arkitektura-lan ospetsu asko ditu eginak; besteak beste: Boa Nova jatetxea eta Leça de Palmeira-ko igerilekuak, biak Matosinhos-en; Schlesisches tor etxebizitzak, Berlinen, eta Portoko Arkitektura Fakultatea. 1988ko sute ospetsuaren ondoren, Lisboako hirigune historikoa berreraikitzeko lanetan parte hartu zuen. Urte horretan bertan, arkitekturako lehen Mies van der Rohe saria eman zioten Vila do Conde-ko Borges Bankuaren eraikinagatik (1982-1986). 1993an, Portugalgo Arkitektoen Elkarteak ematen duen Arkitektura Sari Nazionala jaso zuen, eta Honoris Causa doktore izendatu zuten Lausanako Unibertsitatean (Suitza). Gainera, berak diseinatua da Euskal Herriko Unibertsitateak Bilbon duen Bizkaia Aretoa.

 Ehunetik gora jarduera

MUGAK-eko programazio ofiziala urriaren 10ean hasiko da. Egun horretan, euskal arkitekto gazteentzako 2019ko Peña Gantxegi sariak banatuko dira. Aurtengo edizioan, 2017koan bezala, ehunetik gora jarduera antolatu dira: hitzaldi, erakusketa, lantegi, mahai-inguru, mintegi…

Eusko Jaurlaritzako Ingurumen, Lurralde Plangintza eta Etxebizitza Sailak bultzatzen du MUGAK, eta laguntzaile modura, hainbat administrazio publiko, kultur entitate eta arkitekturaren alorreko zenbait elkarte daude tartean; besteak beste, Donostiako Udala, Gipuzkoako Foru Aldundia, Euskal Herriko Unibertsitateko Donostiako Arkitektura Goi Eskola Teknikoa, Euskal Herriko Arkitektoen Elkargoa eta San Telmo Museoa.

Aurten, Santa Teresa komentuan dagoen Euskadiko Arkitektura Institutua (EAI) izango da Bienaleko egoitza nagusia, baina beste zenbait tokitan ere jarduera ugari antolatu dira, bai Donostian, bai Bilbon eta bai Gasteizen. Urriaren 21etik 27ra artekoa izango da Bienalaren aste nagusia; proposamen gehienak aste horretan landuko dira.

Woody Allen Kursaalean filmatzen dago

Gaurkotasuna / 30 uztaila, 2019

Woody Allenek, Kursaal jauregia aukeratu du, bere film berriko agertokietako bat bezala. Nazioarteko komunikabide ugarik argitaratu dituzte albisteak New Yorkeko Woody Allen zinemagilea Donostian grabatzen ari den filmari buruz. Donostiako Zinemaldiaren inguruan gertatuko den komedia erromantiko bat izango da, eta maila handiko aktoreak izango ditu, hala nola Christopher Waltz, Elena Anaya, Louis Garrel, Gina Gershon, Sergi López eta Wally Shawn.

Kursaala 20 urteotan, hasierako inbertsioa hogei bider gainditu du hark Gipuzkoan izan duen eragin ekonomikoak

Gaurkotasuna / 10 uztaila, 2019

Ia bederatzi miloi pertsonak hartu dute parte 5.336 ekitalditan, eta urteko 293 egunetan erabili da jauregia (egun guztien % 80,3tan ekitaldiren bat izan da bertan). Horrek gutxi gorabehera 1.374 milioi euroko eragin ekonomikoa izan du BPGd-ean. Kopuru horiei erreparatuz, 20 urteotan, hasierako inbertsioa hogei bider gainditu du Kursaalek Gipuzkoan izan duen eragin ekonomikoak.

Bi hamarkadetako balantzearen datuak banakatuz gero, guztira 2.991 bilera izan dira (biltzarrak, konbentzioak, jardunaldiak, azokak, etab.), eta 2.345 ikuskizun. Bilera horietatik, 522 berariaz biltzar eta konbentzioen atalean sartzen dira. Aipatzekoa da biltzarren % 26 nazioartekoak direla. Tipologiari dagokionez, % 28 osasun-sektoreari dagozkio; % 25, hezkuntzari; eta % 14, alor zientifiko eta teknologikoari.

Biltzarren tamainari dagokionez, aipatzekoa da % 42k 400 ordezkari baino gehiago izan dituztela, eta % 60k hiru egun edo gehiago iraun dutela.

Biltzarren artean, hauek nabarmen daitezke: Familiako Medikuntzako Espainiako Elkartearen Biltzarra, Otorrinolaringologiako Espainiako Elkartearen Biltzarra, Kirurgiako Biltzar Nazionala, Gaixo Kronikoentzako Osasun Arretako Nazioarteko Biltzarra, International Meeting for Autism Research, Medikuntza Orokorreko eta Familiako Medikuntzako Biltzar Nazionala, Passion For Knowledge, International Particle Accelerator Conference, 17th Meeting of the European Society for Cognitive Psychology, Symposium on Fusion Technology, 13th European Molecular Imaging Meeting, European Parliament Meeting eta Turismoaren Munduko Erakundearen Kontseilu Exekutiboaren Bilera.

Enpresei dagokienez, hauek egin dute bilera Kursaalen, besteak beste: Henkel, Heineken, Procter&Gamble, L´Oréal, Volkswagen, Deutsche Bank, Bridgestone, BNP, Paribas eta Chrysler.

Erabiltzaileen eta herritarren balorazioa

Etengabeko hobekuntzaren estrategiari jarraikiz, urtero Kursaalek jauregian ekitaldiak antolatzen dituztenen eta jauregiaren bezero direnen gogobetetasuna aztertzen du. Kursaalen antolatutako ekitaldi bakoitzaren ondoren, gogobetetasuna neurtzeko galdera-sorta bat bidaltzen zaie ekitaldiaren arduradunei. Emaitzak aztertu ondoren, hobekuntza-plan bat edo beste jartzen da martxan, kalitate-politikaren barruan. Bezeroek oso nota ona eman diete Kursaali eta bertako instalazioei eta langileei; hau da, batez beste 8,33 puntu 10 etik 20 urteotarako.

Bestalde, bi urtez behin, gipuzkoarren iritzia biltzen dugu; horretarako, Ikerfel enpresa espezializatuak prestatutako galdeketa bat erabiltzen da. Ausaz eta modu anonimoan, jauregian izan diren uneei buruz galdetzen zaie gipuzkoarrei (10etik 8k diote ekitaldiren batean izan direla noizbait), eta Kursaal baloratzeko eskatzen.

20 urteren ondoren, inkestari erantzun diotenek 8,5 puntu eman dizkigute, 10etik, eta erabat jabetzen dira zer eragin nabarmen duen Kursaalek lurraldean, nola ekonomikoa hala soziala. 81ek uste dute gaur egun eragin ekonomiko handia duela, eta 82k, berriz, haren jarduera biziak eragin sozial handia duela.

Kursaalen jarduerak nabariak edo oso nabariak dira (oro har, batez beste % 83), eta, zehatzago, kultura-jarduera % 90 ingurukoa da.  2018an (alegia, jauregia inauguratu eta 19 urte geroago) inkestari erantzun diotenen 72k diote Kursaalek abangoardiaren eta berrikuntzaren itxura ematen diela hiriari eta lurraldeari.

Urtez urte autofinantzatu da

20 urte horietako bakoitzean, jarduera autofinantzatu ahal izan dugu; hau da, ez dugu ekarpen publikorik behar izan ohiko funtzionamendurako. Areago, aurreztu ahal izan dugunez, inbertsioen % 70 finantzatu ahal izan ditugu, zeinak orain arte 8,6 milioi eurokoak izan baitira.

Informazio ekonomikoari buruzko kapituluan, aipatzekoak dira eragin ekonomikoaren inguruko kopuruak; besteak beste, gutxi gorabehera 1.374 milioi euroko eragin ekonomikoa BPGd-ean (lehen aipatu bezala), 136,4 milioi euroko itzulkin fiskala, eta sortutako eta mantendutako 971 lanpostuak.

Donostiako eta Gipuzkoako kultura-erreferentzia

Hiriaren eta lurraldearen kultura-erreferentzia bihurtu da Kursaal. Bertan (Auditorioa, Ganbera Aretoa eta beste gune batzuk), era guztietako 2.345 kultura-ekitaldi, kontzertu, antzezpen eta ikuskizun egin dira guztira, eta haietan guztietan 6 milioi pertsonak baino gehiagok hartu dute parte. Urteen poderioz, ugarituz joan dira ekitaldiak, eta 2018an inoiz baino kultura-ekitaldi gehiago izan dira; alegia, guztira 152.

Sarrerak saltzeko bi kanal daude: leihatila eta Internet. Urtez urte, gero eta sarrera gehiago saltzen dira Kursaalen webgunearen bidez; hala, 2018an, guztira saldutakoen % 78 saldu dira online.

Urtero, nazioarteko hiru jaialdi egiten dira Kursaalen: Donostia Zinemaldia / Festival de San Sebastián, A kategoriakoa, zinemaldietako kategoria gorena (haren harira, 1.600 proiekzio baino gehiago eskaini dira 20 urteotan zehar); Heineken Jazzaldia, Donostiako udan ezinbestekoa, generoko musikari ezagunenez betea; eta Musika Hamabostaldia, musika klasikoko Estatuko zaharrena (500 kontzertu baino gehiago eskaini ditu bi hamarkadetan).

Musikazaleek nahitaez etorri behar dute Auditoriora; izan ere, bertan egiten dira Orquesta Sinfónica de Euskadi/Euskadiko Orkestra Sinfonikoaren abonu-denboraldiko kontzertuak (bi emanaldi egitarauko, eta, guztira, 22 kontzertu urtean).

Logikoa denez, Kursaalen beraren egitaraua osatzen duen Kursaal Eszenaren denboraldiko emanaldiak ere bertan egiten dira. Kursaal kalitateko kulturaren bermea da, eta, sortu zenetik 628 kontzertu eta ikuskizun eskaini ditu, era guztietakoak: musika klasikokoak, familientzako egitarauak, pop eta rock musikakoak, ballet-emanaldiak, etab. Donostiako Udalak eta Gipuzkoako Foru Aldundiak laguntza ematen diote (kapital publikoa), baita Euskal Herriko enpresa adierazgarrienek ere (kapital pribatua), gizarte-erantzukizun korporatiboko apustu gisa. Horri esker, kontzertuek arrazoizko prezioa dute.

Testuinguru honetan, Kursaal Eskura sortu zen 2015ean, Kursaal Eszenaren eta Gipuzkoako zenbait udalen arteko lankidetza-proiektua, lurraldeko biztanleak kontzertu eta ikuskizunetara joan ahal izateko.

Gertaera garrantzitsuak: Mies van der Rohe saritik Tunicken biluzietara

Zaila da bi hamarkada hauetako gertaera garrantzitsuenak aukeratzea, baina hona hemen haietako batzuk: 2001ean eraikinak eta Rafael Moneok Europako Eraikin Onenaren Mies van der Rohe saria jaso zuten; urte hartan bertan, Kursaal Fundazioa sortu zen; eta 2002an Biltzar Jauregien Nazioarteko Elkarteak (AIPC) munduko bost jauregi onenen artean kokatu zuen Kursaal.

2005ean, Zilarrezko «Q» lortu zuen, kudeaketako bikaintasunaren saria, eta, ondorioz, hura bereganatu zuen Espainiako lehenengo biltzar-jauregia izan zen. Hurrengo urtean, New Yorkeko argazkilari Spencer Tunickek 1.200 pertsona biluztu zituen Auditorioko hallean antolatutako performance batean; nazioarteko 50 hedabide baino gehiago etorri ziren.

Gertaera garrantzitsuak: Nobel saridunak eta nazioarteko chefak

2005ean, sei Nobel saridun elkartu ziren Albert Einstein Annus Mirabilis biltzarrean, eta eraikinak zilarrezko Bikain ziurtagiria bereganatu zuen, euskararen kudeaketagatik. 2008an, San Sebastián Gastronomikak 10 urte bete zituen. 2011n, Biltzar Jauregien Nazioarteko Elkarteko (AIPC) Zuzendaritza Kontseiluan sartu zen Kursaal, eta Iker Goikoetxea izan zuen ordezkari. 2013an, Kursaal Fundazioaren jarduera egitarau propio batean jaso zen: Kursaal Eszena.

2012an, Kursaalek eta San Sebastian Convention Bureauk Enbaxadore programa jarri zuten martxan, eta hurrengo urteetan zenbait urteurren izan ziren: Musika Hamabostaldiak 75 urte bete zituen, eta Heineken Jazzaldiak, berriz, 50. edizioa egin zuen.

Kursaal digitala: webgunea eta sare sozialak

Kursaalen webgunea komunikazio-bide nagusietako bat da. Nagusiki agendaren berri izateko erabiltzen da, baina baita sarrerak erosteko eta jauregiak zer gune eta zerbitzu eskaintzen dituen kontsultatzeko ere. 2018an, 631.000 saio baino gehiago izan dira webgunean; hau da, 2017an baino % 21 gehiago. Webgunea darabiltenen kopuruak ere gora egin du etengabe azken urteetan, eta 2018an 400.000 erabiltzaile ingurukoa izan da.

Aipatzekoa da teknologia berriak agertzearekin batera mugikorretako trafikoak nabarmen egin duela gora, eta 2018an ordenagailu edo tabletetakoa baino ia % 60 handiagoa izan dela.

7 urte daramatzagu Facebook-en eta Twitter-en, 3 Instagram-en eta YouTube-n, eta urtebete baino ez LinkedIn-en, eta gero eta pertsona gehiagok erabiltzen dituzte plataforma horiek iruzkinak bidaltzeko eta antolatutako ekitaldien berri izateko. Logikoa denez, Kursaalek bide horien alde egin du jauregia herritarrekin zuzenean harremanetan egoteko. Aipatzekoa da YouTube-n jarri ditugun bideoek 200.000 ikustaldi baino gehiago izan dituztela.

Etorkizuneko Kursaal

Gune eta zerbitzu berriak

Sortu zenetik, 8 milioi euro baino gehiago inbertitu dira guneak eta zerbitzuak hobetzeko, eta horrek jauregia modernizatzea ekarri du. Kursaalek beti egin du etengabeko hobekuntzaren alde. Hori guztia lortzeko, 8,6 milioi euroko inbertsio-ahalegina egin dugu, eta, aldi berean, inbertsioen % 70 finantzatu, superabitei esker.

Jauregiko gune berrietako bat 10. aretoa da. 0. solairuan dago, Ganbera Aretoaren ondoan; 2010ean inauguratu zen eta beste aukera bat ekarri zuen Kursaalen bilerak egiteko. 170 lagunentzako tokia du; lau eratara bana daiteke, zenbat lagun hartu nahi diren.

Ni Neu jatetxearen terraza eraikinaren lehenengo solairuan dago; jauregitik edo jatetxetik du sarbidea, eta bista zoragarriak ditu. 2016an inauguratu zen eta beste aukera bat eskaintzen du ekitaldi txikiak egiteko (esaterako, koktelak, aurkezpenak edo prentsaurrekoak).

Zurriola aretoa ere, zeina 2018an inauguratu baitzen, Kursaalen gune berrietako bat da. Gune argitsu eta pribilegiatua da, ezin hobea bilera txikiak egiteko; 40 lagunentzako tokia du, Ni Neu jatetxearen terrazarako sarbidea, eta ibaira eta hirira ematen du.

Oturuntza Aretoa zenbait egoeratara moldatzean, K Espazioa sortu da. Kontzertuak gazteagoentzat eta giro informalagoan eskaintzeko behar diren argiztapen- eta soinu-elementuak ditu, baita tabernako barra ere; zutik entzuten da musika.

Gune berriak ez ezik, jauregiak bezero eta erabiltzaileentzako zerbitzu hobeak ere eskaintzen ditu. Horrela, 2014an, Kursaalek ticketing zerbitzu bat jarri zuen martxan sarreren erosketa optimizatzeko eta bezeroei erosotasun handiagoa eskaintzeko, ez bakarrik Kursaal Eszenakoei, baizik eta baita kontzertu eta ikuskizun kulturalen gainerako sustatzaileenei ere. www.kursaal.eus webguneko www.kursaal.eus/es/entradas/ eta www.kursaal.eus/eu/sarrerak orrien bidez, Kursaalen online txartel-leihatilak denen eskura daude.

Digitalizazioa: 1.500 metro koadroko LED fatxada bat

1.500 metro koadroko LED argizko fatxada da Kursaalen teknologia berriak eta digitalizazioa ezartzeko ataleko elementu ikusgarriena, baina ez bakarra; badira, baita ere, bereizmen ultrahandiko 4K teknologia Auditorioan eta Ganbera Aretoan, seinaletika digitala, dentsitate handiko wifia, etab.

2018ko urtarriletik, Kursaalen fatxada berria marketin-tresna original bat da. Espainiako LED argizko fatxada handiena da, eta munduko handienetako bat, sortzailea eta dinamikoa, baina baita herritarrekin elkarrizketan aritzeko formula bat ere, argiztapen bereziak jartzen baitzaizkio jaiegun jakin batzuetan eta haren bidez jauregiko ekitaldien berri ematen baita. Azken batean, horrek bereizten gaitu.

Azken belaunaldiko teknologia

2016an, Kursaalek bereizmen ultrahandiko (UHD) 4K teknologia duten proiektoreak jarri zituen, Donostia Zinemaldiaren 64. edizioa zela eta. Lau aldiz bereizmen handiagoa dute Auditorioak eta Ganbera Aretoak, eta gutxi gorabehera argi-potentzia bikoitza filmak eta proiekzio korporatiboak edo biltzarretako proiekzioak ikusteko.

Azken urteetan, goitik behera aldatu ditugu elementu teknologiko guztiak, eta eskari digital berrira egokitu; elementu horien artean ditugu soinu- eta argiztapen-mahaia, foku robotizatuak, dimmerrak, segimendu-kamerak, aldibereko itzulpen-sistemak, bozgorailuak (PA) eta eraikinerako sarbidea.

Berrikuntza teknologikoei dagokienez, aipatzekoa da gaur egun dentsitate handiko wifia dugula. Bestalde, seinaletika biziagoa eta dinamikoagoa da orain, pantaila ugari baitaude, eta, horri esker, denbora errealean egokitu daiteke ekitaldiaren beharretara.

 Kursaal arduratsua: prebentzioa, jasangarritasuna eta irisgarritasuna

Laneko arriskuen prebentzioa kudeatzea lehentasunetako bat da Kursaalentzat. 2014an, OHSAS 18001:2007 ziurtagiria lortu genuen, eta, hobekuntza-planaren barruan, zenbait inbertsio egin ditugu (pasabideak jarri, zamalanetarako plataformak instalatu…) lana garatzearekin erlazionatutako arriskuak saihesteko.

Kursaalen helburuetako bat ingurumena errespetatzen duen politika bat sustatzea ere bada. 2008ko urtarrilean, ingurumen-kudeaketako ISO 14001:2004 ziurtagiria lortu zuen, nazioarteko UNE arauaren araberakoa; haren bidez, jasangarritasunaren eta lehengaiak kontrolatzeko eta aurrezteko politika baten alde, energia- eta ur-kontsumoak murriztearen alde eta hondakinak minimizatzearen alde egiten duela aitortzen da. Hain zuzen ere, ura % 75 aurreztu da, eta elektrizitatea, berriz, % 40.

FITUR turismo-azokan, Kursaalek ingurumen-kudeaketako Aenor bandera jaso zuen 2015ean. Bandera berdeak publikoki aintzatesten ditu kudeaketan hobekuntzak egin dituzten eta ingurumenarekin konpromiso bat hartu duten sektore turistikoak.

Bestalde, Kursaal izan zen irisgarritasun orokorraren ziurtagiria jaso zuen Espainiako lehenengo biltzar-jauregia. 2007ko irailean, AENORek irisgarritasun orokorraren ziurtagiria eman zion biltzar-jauregiari, UNE 17001-2:2001 arauaren arabera. Haren bidez, ezintasuna duten pertsonek Kursaaleko jarduera eta zerbitzu guztietan parte har dezaketela bermatzen da.

Kursaalen 20. urteurreneko gala

Kursaalek etorkizunera begira ospatuko du 20. urteurrena. Auditorioko agertoki handian, zenbait artista bikain elkartuko dira, eraikinaren beraren kultura-jardueraren erakusgarri. Ekitaldirako diseinatutako egitarauan, errepertorio klasikoaren dotorezia eta pop rockaren energia uztartuko dira, baita balletaren dotoretasuna eta abesbatzen indarra ere. Hainbat arlotako emanaldiak eskainiko dira Juan José Ocónen zuzendaritzapean. Alor horietan guztietan gero eta gehiago ari dira nagusitzen goranzko balioak eta emakumeak.

Gaur, uztailak 8, jarriko dira salgai kontzertu horretarako sarrerak.

Azaroaren 28an, osteguna

Kursaaleko Auditorioan, 20:00etan

Prezioak: 50 €, 40 €

 Egitaraua

Euskadiko Orkestra Sinfonikoa / Orquesta Sinfónica de Euskadi

Orfeoi Gazte

Juan José Ocón, zuzendaria / director

Lucía Lacarra, dantzaria / bailarina

Elena Sancho Pereg, sopranoa / soprano

Izaro, abeslaria / cantante

Mikel Erentxun, abeslaria / cantante

Eñaut Elorrieta, abeslaria / cantante

Topaketa: Rafael Moneo eta Iñaki Gabilondo

Azaroaren 28an, 18:00etan, topaketa berezi bat izango da Kursaaleko Ganbera Aretoan. Topaketa horrek maila handiko bi pertsonaia izango ditu protagonista eta solaskide: Rafael Moneo eta Iñaki Gabilondo.

Kursaalen proiektua egin zuen arkitekto nafar ospetsua Iñaki Gabilondo kazetari donostiar handiarekin mintzatuko da, jendaurrean. Biek elkar ezagutzen dute, elkar errespetatzen dute, eta elkar miresten dute. Hori dela eta, oso erraza izan da haiek elkartzea eta hizketan jartzea Kursaalek eragile ekonomiko gisa eta ingurunea eraldatzeko elementu gisa duen eraginari buruz, eraikinaren beraren bilakaerari buruz, behar eta teknologia berrietara egokitzeari buruz, herriei, herritarrei, arkitekturari eta bizitzari buruz. Eta are errazagoa izan da hain urteurren berezia izanda, bientzat oso hunkigarria baita: Kursaalen inaugurazioaren 20. urteurrena.

Elkarrizketa baino, solasaldia izatea nahi da, Donostia, donostiarrak, gipuzkoarrak, bertako eraikinak eta idiosinkrasia, ingurune geografikoa eta bizitzako esperientziak eta lurraldea ondo ezagutzen eta maite dituzten maila handiko bi profesionalen artekoa.

Bi humanista eta jakintsu, hiri eta giza paisaiaren luxuzko bi behatzaile elkarrekin: hori proposatzen du Kursaalek etorkizunera begiratuz (XXI. mendera eta harago) ospatzera eta hausnartzera garamatzaten une honetarako.

Topaketa

Azaroaren 28an, 18:00etan

Kursaaleko Ganbera Aretoan

Doan, aretoa bete arte

 

Loreena McKennitt musikariak itxiko du Kursaal Eszenaren denboraldia, Auditorioa goraino beteta

Gaurkotasuna / 9 uztaila, 2019

Unibertso zeltako izen handiko Loreena McKennitt musikariak kontzertua emango du uztailaren 11an Kursaalen. Kursaal Eszenaren denboraldi honetako azken emanaldia izango da hau. Kanadarrak Lost Souls lana aurkeztuko du: disko berrian bildu dituen kantuetan, memoriak zentzua ematen dio bidean galduta, noraezean igarotzen dugun denborari.

«Nik bera baino, musikak aukeratu ninduen ni» onartzen du McKennittek. Nazioarteko kritikak txalotu du eta 14 milioi diskotik gora saldu ditu. Disko horien artean, estudioan egindako zazpi grabazio daude, baita zuzeneko kontzertu baten DVDa eta bi dokumental ere, besteak beste. Bi alditan Grammy sarietan izendatua izan da, eta askotariko sariak irabazi ditu, tartean, bi Juno, Kanadako musika sari garrantzitsuak. Baina, musikaz gain, zeinari hiru hamarkada baino gehiago eskaini dizkion, Loreena McKennitt giza eskubideen defendatzaile sutsua da, eta karitatezko hainbat proiekturen bultzatzailea ere bada.

Lost Souls (Arima Galduak) diskoan, kantu berriak eta duela urte batzuk sortutakoak bildu ditu: «Kantuok batzuetan arima galduak iruditu izan zaizkit, ez baitzuten beren lekua nire aurreko diskoetan topatu».

Hamabi urte dira berak konposatutako kantu berriekin disko bat ateratzen ez duela. Musika zeltarekiko eta new age-rekiko bere ikuspegi bereziarekin egin du itzulera, espainiar eta arabiar musikaren eraginarekin eta bere ahots ahaltsuarekin nahiz harpa kutunarekin. John Keats eta William Butler Yeats idazleen poemak ere baliatu ditu kantuetako batzuetan.

Bere arima galduen bidez, Loreena McKennitt-ek antzinako garaiez dihardu, gizakiak betidanik bere buruari egin dizkion galderez, eta naturarekiko lotura estuaz. Guzti hau bidaia bat balitz bezala kontatzen du.

Izan ere, konpositore kanadarrak dio, agian, ez gaudela «galduta, beharbada etxera itzultzeko denbora luzea hartzen ari gara».

LOREENA MCKENNITT
Osteguna, uztailak 11 / 20:00
35 €

Sarrerak erosi

Beirut

Beirut taldeak Donostian egingo du geldialdia, disko berriarekin egiten ari den biran, eta sarrerak agortuta daude dagoeneko

Gaurkotasuna / 28 ekaina, 2019

Beirut talde estatubatuarra, datorren asteartean, uztailak 2, Kursaalen izango da, Gallipoli disko berria aurkezten, kontzerturako sarrerak dagoeneko agortuta daudelarik, Zach Condon musikariaren taldea azken diskoko folk amerikarretik urrundu da, berriz ere taldearen aurreko lanetako kantu eklektikoen ildora itzulita: munduko txoko ezberdinetako doinuak bildu ditu beste behin, haizezko instrumentuekin, perkusioarekin edota organo elektronikoarekin.

Haurra zela bere eskolako jazz taldean tronpeta jotzen zuen Condonek, eta Mexiko Berrian bizi zenez, musika mexikarra eta pop estatubatuarra gertutik ezagutu zituen. Nerabezaroan nazioarteko pelikulak proiektatzen zituen zinema areto batean egin zuen lan: bertan Fellini eta haren filmeetako musika ezagutu zuen. Lehen kontratu diskografikoa soilik 19 urte zituela sinatu zuen, eta, berehala, ospea hartu eta nazioarteko birak egiten hasi zen. Bere lehen diskoan musika balkanikoaren eragina azaldu zuen; bigarrenean, berriz, Jacques Brel eta Serge Gainsbourgen kantu frantsesak izan zituen eredu. Mexikoko hileta banda batekin grabatzeko aukera izan zuen jarraian, baita Marokon kantuak idaztekoa ere. Esan beharrik ez da, Zach Condon eta, hortaz, Beiruten ibilbidean ezinbestekoak izan direla bidaiak eta munduko txoko ezberdinetako soinu eta melodiak: “Izatez, musika munduan zehar bidaiatzeko aitzakia perfektua da” dio konpositoreak. Hain zuzen, euren jatorriko folk amerikarra baliatu zuten No No No diskoa da, kritikari dagokionez, erantzun epelena jaso zuena.

Italian grabatu dute azkena, Gallipoli, lehenagoko kantu haietako eklektizismora itzulita. Gallipoli irla-gotortuan prozesio bat ikusi ondoren idatzi zuen Zach Condonek diskoari izena ematen dion kantua: “Emaitza zoragarria iruditu zitzaidan. Nire disko zaharren eta berrien nahasketa katartiko hark musika erraietako esperientzia gisa bizitzera eraman ninduen berriz, zoriontasun zahar hartara”.

BEIRUT
Asteartea, uztailak 02 / 20:00
20 €
Sarrerak agortuta