Gaurkotasuna / 30 urtarrila, 2020
Los Secretos taldeak bere azken lana, “Mi Paraiso” izenekoa, aurkeztuko du ostiral honetan (urtarrilak 31 / 20:00) Kursaaleko Auditorioan, salgai sarrera gutxi batzuk baino gelditzen ez direlarik. Alvaro Urquijok gidatzen duen banda honen hamalaugarren estudioko lana da hauxe.
Tendentzia eta modetatik at, Los Secretos taldeak, ilezkorrak diren bere kantuen grinari bere horretan eutsi dio denboran zehar, eta grina hori bera helarazi nahi izan die, taldearen musika imitaezin eta denboraz kanpokoarekin hazi diren jarraitzaileei.
Taldea sortu zenetik 40 urte igaro diren honetan, Los Secretos funtsezko banda da estatu espainiarrean. 80.hamarkadan Madrilgo olatu berriko talde ikurra izandakoak, hiru kide historikoren heriotza gainditzea lortu du eta ave fenix gisa behin eta berriz berpiztu da, XIX. mende honetan, beraien kontzertuetan lau belaunaldi ezberdin elkartzeko gai izatea lortu duelarik.
Los Secretos
Urtarrilak 31 Ostirala /20:00
Kursaal Auditorioa
28 €
Gaurkotasuna / 23 urtarrila, 2020
Iker Goikoetxea, Donostiako Kursaal jauregiaren zuzendari-gerentea, aukeratu dute, aho batez, Espainiako Biltzar Jauregien Elkartearen (APCE) presidente Elkartearen batzar nagusian. Asteazkenean, Nazioarteko Turismo Azokaren (FITUR) lehenengo egunean, izan zen batzarra, IFEMAn (Madril), eta, presidentea aukeratzeaz gain, Batzorde Betearazlea berritu ere egin da, abenduaren 20an hasitako hauteskunde-prozesua amaitu ostean.
Batzarrean, zuzendaritza talde berria berretsi dute hauteskunde-prozesuan parte hartu duten biltza-jauregien zuzendari eta arduradunek. Hauek osatuko dute taldea:
Presidentea: Iker Goikoetxea Mendoza (Kursaal Elkargunea)
Presidenteordea: Javier Lacunza Arraiza (BALUARTE, Nafarroako Batzar Jauregia)
Idazkari nagusia: Belén Mann Cerdeira (IFEMA, Konbentzioak eta Biltzarrak)
Batzordekidea: Yolanda de Aguilar Rosell (Málagako Azoka eta Biltzar Jauregia, FYCMA)
Batzordekidea: Sylvia Andrés Guilló (Valentziako Biltzar Jauregia)
Batzordekidea: Carlos García Espinosa (Cádizeko Biltzar eta Erakusketa Jauregia)
Batzordekidea: Marc Rodríguez Gómez (Bartzelonako Nazioarteko Konbentzioen Zentroa, CCIB)
Presidente berriak zuzendaritza taldeaz esan du ordezkagarritasun geografikoa eta esperientzia dutela, eta «aukera paregabea dugula Elkartea sustatzeko eta bazkideei balio erantsi handiagoa eskaintzeko». Goikoetxearen arabera, helburu hori erdiesteko, «ezinbestekoa da guztiok konpromisoa hartzea»; hortaz, lehenik, erakundea gehiago profesionalizatzea erabaki da, asmo handiagoko helburuak iriste aldera. Presidenteak esan duenez, «une egokia da ideia berriak martxan jartzeko, Elkarteak presentzia handiagoa izan dezan eta nabariagoa izan dadin, eta, horri esker, baliabide eta zerbitzu gehiago eta hobeak eskain ditzagun».
«Gure kokapena, “Premium-aditua” gure indar handia da, eta, hari esker, ezaugarri bereizle hauek ematen dizkigu: esperientzia, zerbitzuaren bikaintasuna eta teknologia berritzaileena. Biltzar eta ekitaldi instituzional edo korporatibo garrantzitsuenak APCEko jauregietan egiten dira. Eta ekitaldi horietan ziurtatuta dago zerbitzuaren bikaintasuna: sektore profesional onenekin lan egitea». Halaber esan du biltzarren industria gero eta dinamikoagoa, espezializatuagoa, jasangarriagoa eta sortzaileagoa dela. Dioenez, «ekitaldiek emozionalki konbentzitu behar dute. Garrantzitsua da faktore teknologikoa, baina funtsezkoa, berriz, giza elementua. Ekitaldiak marka eta ikusleak lotzen ditu emozionalki. Eta biltzar-jauregiok funtsezko zeregina dugu lan horretan».
Besteak beste, helburu estrategiko hauek proposatu ditu zuzendaritza talde berriak Elkartearen aro berriari begira: APCEk bilera eta ekitaldien industrian duen ordezkagarritasuna indartzea, Elkarteko kide diren zentroetako taldeen garapen profesionala sustatzea, eta sektoreari buruzko azterlan eta ikerlan gehiago egitea.
2020an ere, bi ekitaldi hauek izango dute pisu espezifikoa: Udako Eskola (urtero antolatzen du Elkarteak, jauregietako profesionalak trebatzen jarraitzeko; aurten, baliteke Ávilan izatea, azken bi urteetan Málagako FYCMAn izan baita) eta urteko biltzarra (aurten, Gasteizen izango da, uztailaren 1etik 3ra, eta jasangarritasunaz hitz egingo da, besteak beste, gaia garrantzitsua delako eta Arabako hiriburua eta bertako biltzar-jauregia nagusi direlako sektore horretan).
Iker Goikoetxea
APCEren presidente berriak Enpresen Administrazio eta Zuzendaritzako lizentzia eta Zuzendaritza Estrategikoan masterra ditu (Deustuko Unibertsitatea), baita Enpresen Goi Mailako Zuzendaritzako Programa ere (IESE Business School, Nafarroako Unibertsitatea).
2008ko hasieratik da Donostiako Kursaal Elkargunearen zuzendari kudeatzailea, eta, 2011 eta 2015 artean, Biltzar Jauregien Nazioarteko Elkarteko (AIPC) kontseilukidea izan zen.
AIPCn egon zen bitartean, Cádizeko Biltzar eta Erakusketa Jauregiko Carlos García Espinosa presidente zela, presidenteordea izan zen Goikoetxea, eta jarduneko presidentea izan zen azken sei hilabeteetan, buru duen zuzendaritza talde berriarekin pasa den asteazkenean amaitu zen hauteskunde-prozesuari hasiera eman baino lehen.
APCE
Espainiako Biltzar Jauregien Elkartea 1995ean sortu zen; hortaz, aurten, 25 urte beteko ditu. Ekintza komun batzuk jarri nahi ditu martxan biltzar-jauregiak gune fisiko eta antolakuntza-egitura gisa babesteko, eta Espainiako biltzar eta bilerei lotutako turismoaren ardatz egituratzaile gisa jokatzeko. Horrez gain, esperientziak eta ideiak trukatzeko bide eman nahi du gauzatzen duten jarduerarekin erlazionatutako gaien inguruan, baita administrazio eskudunekin proposamenak, kontsultak eta akordioak egiteko aukera eskaini ere. Gaur egun, 32 biltzar-jauregik osatzen dute Elkartea.
Gaurkotasuna / 22 urtarrila, 2020
Eusko Jaurlaritzako Ekonomiaren Garapen eta Azpiegitura Sailak, Euskotrenek eta Euskal Trenbide Sareak antolatuta, “Basque Railway 2020” izeneko nazioarteko IV. Trenbide Jardunaldia egin da Kursaalean. Jardunaldi horretan, Euskal Autonomia Erkidegoan, Estatuan eta Europan sektorearen garapenarekin zerikusia duten 500 eragile baino gehiagoren presentziarekin, Laugarren Trenbide-Paketea indarrean sartzearen ondorioz abiadura handiko sare berriak martxan jartzearen eta trenbide-espazio europarraren liberalizazioaren aurrean planteatzen diren erronkei heldu zaie.
Ekitaldi horretan Europako trenbide-arloko erreferente nagusiek parte hartuko dute. Horien artean aipatzekoak dira jardunaldi baten irekieran parte hartuko duen François Davenne Trenbideen Nazioarteko Batasuneko (UIC) Zuzendari Nagusia. Euskal errealitatera gehiago mugatzen diren gaiei dagokienez, Arantxa Tapia Sailburuak eta Andres Arizkorreta CAFeko presidenteak “Euskadiko Tren industriaren aukerak” gaiaren inguruan hitz egin dute.
Ekitaldiaren laugarren edizioa da. 2007an, plaka gaineko trenbidearen gaia jorratu zen; 2008an, Trenbideko merkantzien garraioari buruzkoa izan zen; eta 2015ean, Prestazio handiko trenbideen ustiapenari buruz eztabaidatu zen bertan. Oraingo honetan, Basque Railway une erabakigarrian egin da, Eusko Jaurlaritzak, ETSren bitartez, Euskal Y-aren Gipuzkoako adarreko obra zibileko lanak amaitu eta, obra zibil osoa 2023an bukatzeko helburuarekin Atotxako (Donostia) eta Ezkioko geltoki berria eraikitzen hastear dagoen unean, hain zuzen ere.
Jardunaldiaren helburua, beraz, bikoitza da. Alde batetik, sektorearekin batera, sare berria zerbitzuan jartzeko eta etorkizunean ustiatzeko konpondu beharreko alderdi teknikoak aztertzea, eta baita Laugarren Trenbide-Paketea indarrean jartzearen ondoriozko agertokia ere. Bestalde, abiadura handiko trenbide-sareen ontasunak eta eskualdeen garapen sozioekonomikoari eta lehiakortasunari eta mugikortasunari egiten dioten ekarpena sozializatu nahi dira, nazioarteko trenbide zabaleraren bitartez ahalmen handiko Europako sareekin konektatuz.
Jardunaldiak Amurrio Ferrocarriles, Bombardier, CAF, Danobat, Dominion, Ekide, Ikusi, Ingeteam, JEZ Sistemas Ferroviarios, Talgo eta Thales enpresen laguntza izango du. Horiek guztiek stand gune bat izango dute, eta bertan, bertaratutako 500 profesionalek baino gehiagok networking-a egin ahal izatea aurreikusten da.
MoUren sinadura SHIFT2RAILekin
Euskadi, Shift2Rail-ekin elkar ulertze memorandum bat (MoU) ixten duen Europako lehen eskualdea bilakatu da. Txekiar Errepublikarekin lortutako gobernu-akordioaren ondoren, Europako eskualde batek trenbide sektoreko ikerketarako eta berrikuntzarako proiektuen tresnekin/deialdiekin jarduteko eta batera finantzatzeko lehentasunezko estrategiak ezartzeko lankidetzarako konpromisoa hartzen duen lehen aldia da. Monique Van Wortel, Shift2Railen arduradunak, eta Tapia sailburuak, Basque Rail Wayren barruan izenpetu dute aipatutako MoUa.
Moniquek azaldu duenez, “Shift2Rail, Bruselatik Europako trenbide ikerketa eta berrikuntza gehiena bideratzen duen Europako Batzordeak sustatutako ekimen publiko-pribatua da”. Shift2Rail-eko arduradunaren arabera, “Akordioa bultzada berri eta garrantzitsua da Euskadiko sektorearen garapenean, eta, aldi berean, Euskadiko eta Europako berrikuntzaren ekosistema indartzeko balioko du”.
Gaurkotasuna / 22 urtarrila, 2020
Gaur egun operaren munduan gailur-gailurrean dagoen Javier Camarena tenorra, hirugarren abeslaria da azken hirurogeita hamar urteetan New Yorkeko Metropolitanen bis bat eskaini duena, Pavarotti eta Flórezekin batera.
Bere interpretazioen edertasunagatik miretsia den tenor mexikarrak programa ikusgarri bat aurkeztuko du Kursaalera egingo duen bigarren bisita honetan (urtarrilak 23). Italiar errepertorioa landuko du batez ere, frantziar eta alemaniar errepertorioetan ere sarraldi batzuk eginez: Charles Gounod, XIX. mendearen amaierako Frantziako konpositore garrantzitsuenetakotzat hartua, eta ahotserako lana erruz konposatu zuena; Édouard Lalo, zeinak gehiago landu baitzituen ganbera-musika eta lied-a, eta opera gutxi idatzi zuen, Le roi d’Ys besteak beste, Wagnerren eraginpekoa bestalde. Rossini, Bellini eta Donizettirekin bizi izan zuen belcantoak bere urrezko garaia; hirurek bilatu zuten legatuaren produkzio perfektua ahots-erregistro osoan zehar, eta orobat garatu zituzten elemento birtuosistikoak, nola diren koloratura, trioa, agudo eta sobreagudo distiratsuak eta arnasketaren erabilera biribila.
Donostian eskainiko duen errezialdirako, oso ezagunak ez diren aria batzuk aukeratu ditu Mexikoko tenoreak, guztiak argitsuak eta eskakizun bokal handikoak. Lehen zatia Ah! Mes amis, quel jour de fête aria ezagunarekin bukatuko da, zeina tenor lirikoen Everest menditzat hartzen baita. Bigarren zatiak belcanto gehiagorekin eta Friedrich von Flotow-en Martha operako aria batekin jarraituko du; izan ere, opera horrek famatu du bereziki konpositore alemaniar hau, oso obra ezaguna izan baitzen XIX. mendearen amaieran eta XX. mendearen hasieran, baina gaur egun oso gutxitan taularatzen da. Alfredo maitemindu batek abesturik, La Travista perako bigarren ekitaldiari hasiera ematen dion ariak itxiko du programa zail hau, zeinarekin Javier Camarenak bere teknika eta talentu natural guztia erakusteko aukera izango baitu
Bisen tenorra
Metropolitaneko balentria 2014an errepikatu zuen Madrilgo Errege Antzokian, 18 “goiko do” akasgabe interpretatu baitzituen La fille du régiment operako Ah! Mes amis, quel jour de fête aria errepikatu zuenean, eta lehen tenorra da bi antzokien historian bi emanalditan jarraian aria errepikatu duena. Duela oso denbora gutxi, historia egin du berriro Donizettiren Una furtiva lagrima errepikatuz Madrilgo koliseoan.
JAVIER CAMARENA
Kursaal Auditorioa
Urtarrilak 23, osteguna, 20:00
50 / 40/ 32 / 26 / 11 €
Gaurkotasuna / 9 urtarrila, 2020
Frank Peter Zimmermann bakarlari gonbidatuak bertan behera utzi du datozen egunetarako programatutako kontzertua. Erortze handi batek eragindako lesio baten ondorioz, bertan behera utzi behar izan ditu Euskadiko Orkestrarekin programatutako bost kontzertuak. Halakorik ezean, orkestrak Brucknerren 9. Sinfonia interpretatuko du azken bertsioan, bigarren zatirako hasieran programatutako hiru mugimenduei laugarren Finale ezohikoa gehituz. Sinfonia osoa 90 minutuko musikak osatzen du, eta horrek esan nahi du hasierako programaren iraupen bera duela. Aukera paregabea izango da Austriako konpositorearen “azken maisulantzat” jo izan dena bere osotasunean ezagutzeko.
