Gaurkotasuna / 17 ekaina, 2021
Ekainaren 20ko igandean Kursaal Auditorioan arituko dira bi bider, 17:30ean eta 20:00etan
Iseo & Dodosound bikote nafarra Donostiako Kursaalen arituko da udako solstizioaren bezperan, ekainaren 20an, Kursaal Eszenaren denboraldiari amaiera emanez. Euren “Inédito Tour” kontzertu-sortari dagokion ikuskizunaren bi saio emango dituzte, 17:30ean lehena eta 20:00etan bigarrena.
Astelehenean entzun ahal izan genuen lehen aldiz, Radio3 irratiko Siglo 21 saioan, gaur bertan plataforma digitaletan entzungai jarriko duten “Arigato”, luze gabe argitaratuko duten estudioko hirugarren lan luzearen aurrerapen kantua: eleanitza, igaro diren oholtzei gorazarre egiten diena, eta estilo nahiz etiketen gainetik musikaren indarra aldarrikatzen duena.
Hain zuzen, Leire Villanuevak eta Alberto Iriartek zuzenean aurkeztuko dituzte lantzen aritu diren kantuak, diskoa kaleratu aurretik. Kantu berri horiek lehen aldiz entzuteko aukera emango duen “Inédito Tour” deritzon bira oso hiri gutxitara helduko da eta Donostia da horietako lehena. Eszenatokian, Iseo & Dodosoundek lagun izango dute The Mousehunters taldea. Ohikoa dute haize talde horren lankidetza eta oraingo honetan ahalegin berezia egin dute horien laguntzaz hirugarren diskoko doinuak modu esklusiboan bere jarraitzaileei aurkezteko.
Iseo & Dodosound bikoteak 2014an ekin zion bere ibilbideari. Askotarikoak dira lantzen dituzten musika estiloak. Urteotan bi disko kaleratu ditu, “Cat Platoon” (2015) eta “Roots in the Air” (2017) eta orain aurkeztuko dituen doinu berriak izango dira sortu berri duten Twin Cats Records zigilupean plazaratuko duten estudioko lana osatuko dutenak.
Ekainaren 20an, igandea, Kursaal Auditorioan emango dituzten bi emanaldietarako sarrerek 22 €ko salneurria dute eta www.kursaal.eus webgunean edo Kursaaleko leihatilan eskura daitezke.
Iseo & Dodosound
Kursaal Auditorioa
Ekainaren 20 igandea, 17:30
Ekainaren 20 igandea, 20:00
22 €
Erosi sarrerak 17:30erako
Erosi sarrerak 20:00etarako
Gaurkotasuna / 10 ekaina, 2021
Ekainaren 13an, igandearekin, kursaal Eszenaren baitako bi emanalditan, Gianpiero Zanoccok zuzenduta eta Chouchane Siranossian biolinista bakarlari dela
Ekainaren 13an, igandearekin, Venice Baroque Orchestra, interpretazio historizistaren alorrean nazioarte mailako orkestrarik nagusienetakoa estreinako aldiz ariko da Kursaal Eszenak musika klasikoari eskaintzen dion atalean. Egun berean izango diren bi emanaldietan musikaren historiako obrarik ospetsuenetakoa interpretatuko du: Antonio Vivaldiren “Lau urtaroak”. Gianpiero Zanoccoren zuzendaritzapean eta Chouchane Siranossian biolinista lagun duela, Francesco Geminianiren Concerto grosso nº 12, “La Follia” interpretatuko dute atariko guisa.
1997an Andrea Marconek sortua, Venice Baroque Orchestrak lan egiten du XVII eta XVIII mendeko lanak berreskuratzen. Testuinguru horretan, estreinatu ditu Francesco Cavalliren L’Orione, Vivaldiren Atenaide, Benedetto Marcelloren La morte d’Adone eta Boccheriniren Il trionfo della poesia e della musica eta La Clementina. Mundu mailan historizismoaren baitako orkestra azpimarrgarienen gisa aitortua, hainbat bira egin du Europa, EEBB eta Asian barrena Philippe Jaroussky kontratenorrarekin; kontzertuak Marie-Nicole Lemieux kontraltoarekin Frantzian eta Belgikan; emanaldiak Kroazia, Alemania, Espainia, Frantzia, Mexiko, EEBB eta Kanadan, eta bira bat egin zuen Magdalena Kožená mezzosopranoarekin, eta Istambuleko Jaialdian eta San Petersgurgoko Mariinsky Antzokian aritu ziren. Gianpiero Zanocco, Kursaaleko emanaldietan kontzertino eta zuzendari ariko dena, 2003tik da orkestrako kide eta, horrezaz gain lankide aritu da beste hainbat orkestrekin: L‘Arte dell’arco, I Solisti Italiani, Fenice di Venezia, Filarmonia Veneta eta abar.
Chouchane Siranossian Barrokoko errepertorioan bereiztutako biolinista nagusienetako da egun nazioartean eta bakarlari gisa nahiz orkestra ugarirekin lankidetzan aritzen da. Aipagarri da, halaber, egungo musikagileekin batera lankidetza, esaterako Daniel Schnyder, Marc-André Dalbavie, Michael Rosin, Bechara El-Khoury, Éric Tanguy, Benjamin Attahir edo Thomas Demengarekin. 2015ean sortuko Esperanza taldearen buru da eta 2018an Opus Classic sari bat eskuratu zuen horrekin batera. Etorkizunerako proiektuen artean, 21/22 denboraldirako bira bat aurreikusita du Les Siècles talde frantziarrarekin bakarlari gisa. Venice Baroque Orchestraren lankide gisa, 2019an Tartiniren kontzertuak grabatu zituen Alpha Classic zigilupean.
Venice Baroque Orchestrak ekainaren 13an, igandearekin, Kursaalen emango dituen bi kontzertuetarako (17:00etan eta 19:30etan) sarrerak eros daitezke www.kursaal.eus webgunean eta Kursaaleko leihatilan.
Gaurkotasuna / 4 ekaina, 2021
Espainiako Biltzar Jauregien Elkartearen (APCE) lehen Workshopa ospatu da Kursaalen ekainaren 3 eta 4ean. Biltzarretako turismoaren alorreko bilara honen helburua Biltzar Jauregien kalitate-zigiluari balioa ematea izan da elementu bereizle gisa, bai eta ezagutza- eta negozio-sare bat sortzea ere, kide diren jauregien artean merkaturatzeko eta biltzarrak erakartzeko lana errazteko.
Gipuzkoako hiriburua, Espainiako zenbait biltzar-jauregik parte hartu duten topaketa profesional garrantzitsu honen egoitza izan da. Besteak beste, Valentziako, Kanariar Uharteetako, Malagako, Coruñako, Salamancako, Granadako edo eta Madrilgo biltzar-jauregiek eta biltzarrak antolatzen dituzten elkarteen ordezkariek parte hartu dute. Kongresu horiek oso irizpide espezifikoak eta zorrotzak bete behar dituzte, eta, era berean, kongresuen ordezkariek erakutsi behar dute erabakitzeko gaitasuna eta eragina dutela etorkizuneko edizioen destinoak zehazteko orduan.
Topaketa honetan Kursaal eta Donostia bertatik bertara ezagutzeko aukera izan dute. Horretarako, egitarau zabala bat prestatu da. Hasteko, hiriaren aurkezpena egin du Cristina Lagé Turismo Iraunkorreko zinegotziak. Ondoren, parte-hartzaileek hiriko hainbat kokaleku enblematiko bisitatu dituzte, Santa Klara uhartean kokatuta dagoen Cristina Iglesias artista donostiarraren Hondalea lana barne, eta euskal gastronomia dastatzeko aukera ere izan dute.
APCE
Espainiako Biltzar Jauregien Elkartea 1995ean sortu zen, eta Iker Goikoetxea, Kursaaleko zuzendari gerenteak sostengatzen du gaur egun lehendakaritza. Elkarte honen asmoa Biltzar Jauregiak espazio fisiko eta antolaketa-egitura gisa duen garrantzia nabarmentzeko ekintza komunak abian jartzea da, eta Espainiako biltzar eta bileretako turismoaren ardatz egituratzaile gisa jardutea. Era berean, garatutako jardueraren berezko gaiei buruzko esperientziak eta ideiak trukatzea ahalbidetu nahi du, bai eta administrazio eskudunekin proposamenak, kontsultak eta akordioak egitea ere. Gaur egun, 33 Kongresu Jauregiren Elkarteko kide dira.
Gaurkotasuna / 4 ekaina, 2021
Bi emanaldi izango dira, Kursaal Eszenaren Klasikako programazioan
Ekainaren 9an, asteazkenarekin, Euskal Barrokensemblek, Enrike Solinis zuzendari duen antzinako musika taldeak Kursaal Eszenaren programazioaren baitan gauzatuko du euren azken lanaren erabateko estreinaldia: “Subh, Al–Andalus gobernatu zuen emakumezko esklabo baskoia”. Bi emanaldi izango dira, 17:00etan eta 19:30etan.
Proiektu horrek musika, kantu flamenkoa, dantza, narrazioa, kantua eta bertsolaritza uztartzen ditu pertsonaia historiko baten nondik norakoa marrazteko. Subh da pertsonaia hori. Emakume baskoi hori esklabo zela iritsi zen Al-Andalusera eta, ziur asko bere musika eta literatura ezagutza sakonak medio, Al-Hakam II kalifaren begiko bihurtu eta andere handi izendatu zuten; ondoren, kalifaren seme zaharrenaren, Hishamen ama izanagatik erregina izan zen. Hogei bat urtean, 976tik 996ra, kalifatoa gobernatu zuen eta Almanzor-i berari ere aurre egin zion, bere semearen herentzia babesteko asmoz betiere; izan ere, horretarako adina nortasunik ez zuelako edo gaixotasunen zuelako, Hisham ez zen kalifatoa bere kabuz gobernatzeko gai izan. Hartara, Subh, esklabo baskoia kalifatoaren historian protagonista izan zen, Almanzor-ek agintaritzatik baztertu zuen arte; Almanzor handik urte gutxira zendu eta kalifatoa taifa txikitan banatzeak horren gainbehera ekarri zuen.
Al-Andalus-en historiaren baitan kokatutako Subhen historia kontatzeko, Euskal Barrokensemblek eta Enrike Solinisek askotariko diziplinak biltzen dituen ikuskizuna sortu dute eta, garaiko musika testuingurua islatzeko, alor desberdinetako artistak hartu dituzte bidelagun. Aro hartan, orduko errealitatearen ildotik, musika kultura anitzek bat egin zuten; horien artean, arabiarraren eta judu-kristauaren bat egitetik sortu zen musika andalusia, XI eta XII. mendeetan garatu zena. Publikoak Subh, esklabo baskoiaren historia errazago jarrai dezan, Mikel Zuzak hautatutako testuak baliatu dituzte.
Euskal Barronsemblerekin batera eta Enrike Solinisen zuzendaritza artistikoaren pean (giterna eta laud andalusia jotzearekin batera), ikuskizunean ariko dira Warda Mallal andalusi dantza bikotea, Bilaka Dantza Kolektiboa, Rosario La Tremendita flamenko-kantaria, Josean Bengoetxea, narratzaile lanetan; Julio Soto bertsolaria eta Capilla Wasconiae abesbatza.
Enrike Solinisek, antzinako musikan bereiztutako bilbotar musikariak 2006. urtean sortu zuen Euskal Barrokensemble. Estilo ezberdinetan adituak diren musikariek osatzen duten taldea da eta, zeharkakotasuna oinarri hartuta, Errenazimenduko, Barrokoko eta XX. mendeko musikak interpretatzen eta birsortzen dituzte, arreta berezia jarriz ahozko tradizioaren bidez transmititutako musikatan. Euren proiektu berriztatzaileetan, birsortzearekin batera inprobisazioari tartea egiten diote (“Colores del Sur, baroque dances for guitar”, “Euskel Antiqva, le legs musical du Pays Basque”, “El Amor Brujo, esencias de la música de Manuel de Falla”). Nazioarte mailan aitortua, honakoetan izan da, besteak beste: Vienako Konzerthaus, Ludwigsburgeko Jaialdia, Stockholm Early Music Festival jaialdia, Spring Festival Prague, Bilboko Musika-Música, Musika Hamabostaldia, Madrilgo Auditorio Nazioanala eta Brujaseko Konzertgebouw.
Erabateko estreinaldi horren bi saioetarako sarrerak eros daitezke www.kursaal.eus webgunean eta Kursaaleko leihatilan.
Gaurkotasuna / 27 maiatza, 2021
Kursaal Eszenak eta Euskadiko Orkestrak koprodukzioan aurkezten dute proposamen berri hau
Maiatzaren 29ko larunbatean, Kursaal Eszenak dei egiten die berriz ere haur eta helduei familiartean zuzeneko musikaz gozatzera. “Living Room Music” euskarazko ikuskizuna, perkusioak eskaintzen dituen aukera mugagabeak oinarri hartuta Euskadiko Orkestrako Musika Gelak garatutako ekoizpen berria, 6 eta 10 urte bitarteko haurrei dago zuzenduta.
Mikel Cañadak, Euskadiko Orkestrako Musika gelaren koordinatzaileak “Living Room Music” ikuskizuna eraiki du John Cage-en izenburu bereko obratik abiatu eta zenbait konpositoreren lanak lotuta; musika horren gainean, 2020an bizi izan genuen konfinamenduko oroitzapenak iradoki eta gizakiok, perkusio bidez, ia edozer gauzarekin soinuak, erritmoa eta, ondorioz, musika sortzeko dugun gaitasuna azaltzen dituen parodia dibertigarria sortu du.
“Living Room Music” muntaian, lau perkusionistek (Anthony Lafargue, Héctor Marqués, Igor Arostegi eta Gorka Catediano) harriduraz hartzen dute laurek elkarrekin, apartamendu berean, berrogeialdia egin behar duteneko albistea. Derrigorrezko itxialdiagatik barruak nahastuta dituztela, lau pisukideek etxeko tresna ugari erabiltzen dituzte, perkusio bidez, musika sortzeko: mahaiak, goilarak, abanikoak, ura, lanparak, loreontziak, eskailerak edo zabor-ontziak eta baita eskuak zein ahotsa, guztia erabilgarri dute itxita dauden bitartean dibertitzeko erritmoak sortzeko. Bitartean, kanpoaldearekin duten lotura lotsik gabeko aldamenekoa da, hainbeste “zarata”rekin amorrazita, une oro musikariak gogaitzen ematen duen sopranoa; paper hori Ana Hernández Sanchiz aktoreak jokatzen du.
Anthony Lafargue eta Héctor Marqués Euskadiko Orkestrako perkusio bakarlariak dira, eta Igor Arostegi bakarlari laguntzailea; Gorka Catediano, aldiz, sarritan aritzen da orkestren lankide eta Trío Zukan zein IKKO Percussion Group-eko kidea ere bada. Ana Hernández Sanchiz iruindarrak arte eszenikoen alderdi ugari lantzen ditu (aktorea, ikuskizunen sortzailea, gidoigilea…) eta aditua da musika hezkuntzan.
Kursaal Eszenak Euskadiko Orkestrarekin koprodukzioan antolatutako familiarteko ikuskizun honetarako azken sarrerak salgai daude www.kursaal.eus webgunean eta Kursaaleko leihatilan.
LIVING ROOM MUSIC
Anthony Lafargue, Héctor Marqués, Igor Arostegi, Gorka Catediano, perkusioa
Ana Hernández Sanchiz, aktorea
J. Cage, F. J. Cogollos, J.S. Chapi, C. Kahlua, S. León, F. Tárrega, J. Guillem, M. Wettlen obrak
Kursaal Auditorioa
Maiatzaren 29 larunbata, 18:00
Gaurkotasuna / 19 maiatza, 2021
Scapino Ballet Rotterdam-ek bere herrialdetik kanpo aritzeko ezintasunagatik, Klasikaren ataleko emanaldiak bertan behera utzi eta gero
Venice Baroque Orchestra ekainaren 13 igandean ariko da Kursaal Eszenaren programazioaren baitan, 17:00 eta 19:30etan. Italiar taldea Chouchane Siranossian biolinistarekin batera aurkeztuko da donostiar publikoaren aurrean. Hartara, iazko azarorako iragarri arren, Covid-19aren ondorioz ezarritako murrizketengatik bertan behera geratutako kontzertuei helduko zaie berriz ere.
Izan ere, Covid-19aren eraginei aurre egiteko berriki Herbeheretan hartutako neurriak direla eta, Scapino Ballet Rotterdam konpainiak bertan behera utzi behar izan ditu datorren igandean (maiatzak 23) Kursaal Eszenaren atal klasikoaren baitan ematekoak zituen ikuskizunak, neurri horiek ezinezko egiten baitiote jaioterritik kanpo dituen konpromezuei erantzutea.
Horren ordez, eta denboraldiko abonua osatu aldera, ekainaren 13an, igandearekin, (17:00 eta 19:30) Venice Baroque Orchestra eta Chouchane Siranossian biolinistak interpretatuko dituzte Francesco Geminianik (1687-1762) 1729an Corelliren Sonata Op. 5 12. zkia oinarri hartuta idatzitako concerto grosso re minorren, “La Follia”, eta Antonio Vivaldiren (1678- 1741) “Lau urtaroak” ezaguna. Orkestra italiarra eta Chouchane Siranossian sarri aritzen dira lankidetzan, esaterako 2020an Tartiniren kontzertuak biltzen dituen diskoaren grabaketan, Andrea Marconen zuzendaritzapean; grabaketa horrek zenbait sari merezi izan du honezkero.
Venice Baroque Ensemble taldearen bi emanaldietarako sarrerak gaurtik aurrera eros ahalko dira kursaaleszena.eus webgunean eta Kursaaleko leihatilan.
Bestalde, Kursaal Eszena zuzenean harremanetan jarriko da bertan behera gelditu diren Scapino Ballet Rotterdam konpainiaren emanaldietarako sarrerak dituzten pertsonekin.
VENICE BAROQUE ENSEMBLE
Chouchane Siranossian, biolina
F. GEMINIANI: Concerto grosso re minorren “La Follia”
A. Vivaldi : “Lau urtaroak” Op. 8 1-4 zkiak.
Kursaal Auditorioa
Ekainaren 13 igandea 17:00 h. / 19:30 h.
45 / 36 / 29/ 23 €
Gaurkotasuna / 11 maiatza, 2021
Ekainaren 20an Kursaal Auditorioan izango diren bi emanaldietarako sarrerak gaurtik aurrera izango dira salgai
Iseo & Dodosound bikote nafarra Donostiako Kursaalen ariko da ekainaren 20an, igandearekin, Kursaal Eszenaren programazioaren baitan. Euren “Inédito Tour” kontzertu-sortari dagokion ikuskizunaren bi saio izango dira, 17:30etan lehena eta 20:00etan bigarrena.
Denbora luzez zuzeneko kontzerturik eman gabe estudioko lanean murgilduta egon ostean, Iseo & Dodosound-ek, hau da, Leire Villanuevak eta Alberto Iriartek zuzenean aurkeztuko dituzte argitaratzear den euren azken laneko kantuak, diskoa kaleratu aurretik. Kantu berri horiek lehenbiziko aldiz entzuteko aukera emango duen “Inédito Tour” deritzon bira oso hiri gutxitara helduko da eta Donostia da horietako bat. Eszenatokian, Iseo & Dodosoundek lagun izango dute The Mousehunters taldea. Ohikoa dute haize talde horren lankidetza eta oraingo honetan esfortzu berezia egin dute horien laguntzaz hirugarren diskoko doinuak modu esklusiboan bere jarraitzaileei aurkezteko.
Iseo & Dodosound bikoteak 2014an ekin zion bere ibilbideari. Etiketatatik harago, askotarikoak dira lantzen dituzten musika estiloak. Urteotan bi disko kaleratu ditu, “Cat Platoon” (2015) eta “Roots in the Air” (2017) eta orain aurkeztuko dituen doinu berriak izango dira sortu berri duten Twin Cats Records zigilupean plazaratuko duten estudioko lana osatuko dutenak.
Ekainaren 20an Kursaal Auditorioan emango dituzten bi emanaldietarako sarrerek 22 €ko salneurria dute eta www.kursaal.eus webgunean edo Kursaaleko leihatilan eskura daitezke gaurtik aurrera.
Iseo & Dodosound
Kursaal Auditorioa
Ekainaren 20 igandea, 17:30 h.
Ekainaren 20 igandea, 20:00 h.
22 €
Gaurkotasuna / 30 apirila, 2021
Donostiako konpainiak bi funtzio eskainiko ditu (larunbata, maiatzak 1 / igandea, maiatzak 2 /19:30), bereziki haur eta gaztetxoentzat moldatua izan den eta igande arratsaldean (17:00etan) gauzatuko den hitzordu bereziarekin batera.
Requiem meza garai orotako musikagile askok landutako generoa da, baina Mozartena bide da publiko zabalarentzat erakargarrienetakoa eta iradokitzaileenetakoa. Obra amaitugabea da, eta haren hainbat bertsio sortu dira, nahiz eta guztien artean ospetsuena Süssmayr musikagileak osatutakoa den, Mozarten berezko araztasuna berreskuratzeko ahalegin betearen isla delako. Requiem meza Salzburgoko maisuak idatzitako azken obra da, eta bertan garai hartako estilo guztiak uztartu zituen, sentimendu erlijiosoa oso modu berezian landuz: erakunde orotarik bereiziz eta musika huts bihurturik, hain zuzen ere.
Musikaren historian obra garrantzitsuenetakoa den eta normalean kontzertu bertsioan entzun ohi den Requiem hau da, Opus Liricak bere azken produkzioan eszenaratuko duen lana. Hala ere, XXI.mendeera moldatutako bertsioa eskainiko du eta, zehatzago esanda, Covidaren aldira ekarrita: “Requiem-a, pandemia dela eta bizitzea tokatzen ari zaigun aldirako lan ezin egokiagoa da. Gure bertsioan gizateria da gogoeta egiten duena, eta kaos egoera honetara ekarri gaituen hildotik segi behar duen ala norabidea aldatu behar duen mahaigaineratuko duena”.
Asteburu honetan Kursaalen estreinatuko den Opus Liricaren proposamen berritzaile honetan, orkestra fosoan izango da, eta eszenatokiak itxaron-gela edota purgatorio baten traza hartuko du. Hantxe ausnartuko du gizateriak bere etorkizunari buruz. Bakarlarien zerrenda Ainhoa Garmendia (sopranoa), Lucía Gómez (mezzosopranoa), Aitor Garitano (tenorra) eta César San Martin (barítonoa)-ek osatuko dute. Abesbatza eta orkestra muntaia honetarako bereziki hautatu diren musikari eta ahotsez osatuta egongo dira eta guztiak ere Alain Ayerdiren zuzendaritzapean ariko dira.
Funtzio hauetarako sarrerak, eta baita igande arratsaldeko hitzordu “familiarrerako” sarrerak ere (17:00), eskuragarri daude www.kursaal.eus web gunean edota Kursaaleko leihatilan.
“REQUIEM”, MOZART
(Eszenaratua)
Opus Lirica
Kursaal Auditorioa
Maiatzak 1, larunbata, 19:30
Maiatzak 2, igandea, 19:30
51 €
“BETIRARTE MOZART!”
Musika Familian
Opus Lirica
Kursaal Auditorioa
Maiatzak 2, igandea, 17:00
25 € / 15 € (12-18 urte) / 8 € (12 urtetik beherakoak)
Gaurkotasuna / 20 apirila, 2021
Tolosako sopranoa ostegun honetan, apirilak 22, izango da Auditorioan (17:00etan eta 19:30etan), euskal kantuak eta espainiarrak bere ibilbidean esanguratsuenak izan diren operatako ariekin batera abestuz.
Kursaal Eszenaren kontzertu denboraldiak, musika klasikoari eskainitako atalean, Vasili Petrenko errusiarrak zuzentzen duen Royal Liverpool Philharmonic-en emanaldia aurreikusten zuen datorren apirilaren 24rako. COVID-19aren krisialdiak eragindako murrizketa ezberdinen ondorioz, kontzertu hori, ordea, ez da egingo eta, bere ordez, beste hitzordu bat programatu du Kursaal Eszenak. Hala, Ainhoa Arteta soprano ezaguna izango da, Javier Carmena piano-jotzailearekin batera, Kursaaleko agertokian.
Zalantzarik gabe, Ainhoa Arteta dugu historiako euskal sopranorik nazioartekoena, distiratsuena eta ezagunena. Hogeita hamar urte baino gehiagoko ibilbide luzean, funtsezko tokia izan dute errezitaldiek, opera-lanekin batera. Abestu duen agertoki guztietan, piano-jotzaile ospetsuenek lagunduta beti, oso aintzat hartua izan da beti Artetaren lana, genero horri heltzeko orduan erakusten duen karisma, nortasuna eta komunikatibotasunagatik.
Ostegun honetan, apirilak 22, Kursaal Auditorioan interpretatuko duen programak ondo bereizitako hiru zati izango ditu: euskal kantua ardatz izango duen lehen zati bat, Espainiako eta Hispanoamerikako errepertorioko kantuez osatutako beste bat, eta Tolosako sopranoaren opera kutunenetako ariez osatutako hirugarren eta azken zati bat. Besteak beste, Guridi, Aita Donostia, Cilea eta Pucciniren lanak interpretatuko ditu. Berriki zendutako Antón García Abril-en piezak ere programaren zati izango dira; izan ere Ainhoa artetak lan-harreman hestua izan zuen konposagile terueldarrarekin.
Bi errezitaldi hauetarako sarrerak eskuragarri daude www.kursaa.eus web orrian. Nahi izanez gero, Kursaaleko leihatilan ere eskuratu daitezke.
AINHOA ARTETA, sopranoa
Javier Carmena, piano-jotzailea
Kursaal Auditorioa
Osteguna, apirilak 22, 17:00 / 19:30
42 / 34 / 27 / 22 €
Gaurkotasuna / 26 martxoa, 2021
Ainhoa Arteta sopranoa Kursaal Eszenaren denboraldian izango da apirilaren 22an, Kursaal Auditorioan eta Javier Carmena pianista lagun duela, eskainiko duen errezitaldi bikoitzarekin (17:00 eta 19:30). Hitzordu hauek denboraldiko musika klasikoko abonamenduan barneratzen dira, eta Royal Liverpool Philharmonic-ek apirilaren 24an eskaintzekoa zuen, baina pandemiaren eraginez bertan behera gelditu den, kontzertua ordekatzen dute. Errezitaldi hauetarako sarrerak eskuragarri daude www.kursaal.eus web orrian eta Kursaaleko leihatilan.
Coronavirusaren eragina nabaria izango da ekainerako iragarrita zegoen programazioan ere. Izan ere Wilco talde esatubatuarrak (ekainak 15) eta Bryan Ferry bakarlari britaniarrak (ekainak 22) eskaintzekoak zituzten kontzertuak bertan behera gelditu dira. Kontzertu hauetarako sarrerak internet bidez erosi zituzten lagunei automatikoki itzuliko zaie sarreren zenbatekoa. Sarrerak leihatilan erosi zituztenek, aldiz, 943 00 31 70 zenbakira deitu beharko dute diru-itzultzea eskatzeko.
Gaurkotasuna / 17 martxoa, 2021
- Lankidetza-hitzarmena berritu dute, gizarte-erantzukizuna eta lankidetza publiko-pribatua argi eta garbi gauzatuz.
- Hitzarmenak, Gipuzkoako lurraldeari maila goreneko musika klasikoa eta herrikoia eskaintzen dizkion kultur-programa zabal eta eskuragarria indartzen jarraitzea ahalbidetuko du.
Kursaal Elkargunea eta Euskaltelek Gipuzkoako lurraldean edonoren eskura dagoen kultura irisgarria sustatzen duen lankidetza-hitzarmena berritu dute . Hala, operadoreak Kursaal Eszenarekin duen konpromezua berretsi du, kulturaren adierazgarri den entitate honen kudeaketan aktiboki parte hartuz, eta haren irudi berritzaile eta garaikidea partekatuz.
Hitzarmena sinatzeko ekitaldian, Euskalteleko presidentea den Xabier Iturbek eta Kursaaleko zuzendari-kudeatzailea den Iker Goikoetxeak berretsi dute bi erakundeen arteko lankidetza. Kursaal Eszenaren hastapenetatik irmo mantendu den lankidetza da hauxe; zerbaitegatik partekatzen ditu Euskaltelek balio eta ikuspegi estrategiko berdinak, eta baita lurraldearekiko nahiz bere jarduera garatzen duen gizartearekiko gertutasuna eta konpromezua ere.
Euskalteleko presidentearentzat ezinbestekoa da, orain inoiz baino gehiago, kulturaren aldeko apostua mantentzea. COVID-19ak eragindako krisialdian murgilduta gauden honetan, ziurgabetasunak kolpatutako gizartean, “ ekimen publiko-pribatutik abiatuta, Kursaal Eszenak eskaintzen duen proiektuarekiko konpromezu sendoa, gizarte-erantzukizunaren adibide garbia da erakunde honekiko, Donostia hiriarekiko eta, orohar, Gipuzkoako gizartearekiko”.
Xabier Iturbek era berean nabarmendu du “Kursaal Eszenak urtez-urte gorpuzten duen programa anitza eta kalitatezkoa, zeina hobekuntzaren, sormenaren, talentuaren eta berrikuntzaren islada den. Nahiz eta pandemiak murrizketa ugari ekarri dizkigun, Kursaal Eszenan parte hartzen dugun enpresa eta instituzioek jakin badakigu landutako programazio batekin gizarteari eraikuntza, aberastasuna eta ongizatea ematen jarraituko dugula”.
Kursaaleko zuzendari-kudeatzailea den Iker Goikoetxeak, bere aldetik, Euskaltelek Kursaal Eszenari eskaintzen dion babes “irmo eta jarraipenekoa” eskertu du, eta aldi berean azpimarratu du Euskaltelena bezalako ibilbide luzeko lankidetzek duten garrantzia Kursaal Eszenaren izateko arrazoia, kalitatezkoa baina aldi berean eskuragarria den kultura-programazioa eskaintzekoa, babesteko.
Euskaltelek Kursaal Eszenari 2001.urteaz geroztik emandako babesari esker, nazioarteko sona duten artista ugari aurkeztu ahal izan dira Kursaalaren programazioan, urte luzeetako iblibide honetan: Bob Dylan, Lou Reed, Van Morrison, Cecilia Bartoli, Anne Sofie von Otter edota Simon Bolivar Orkestra Sinfonikoa, besteak beste, bertako erreferentzia diren Benito Lertxundi, La Oreja de Van Gogh, Ainhoa Arteta edota Donostiako Orfeoiarekin batera.
Kursaal Eszena
Kursaal Eszena, bere 21. denboraldian murgilduta dago oraintxe, kalitatea eta ospea ezaugarri dituen programazio baten onurarako kapital publiko eta pribatuaren arteko konplizitateak duen garrantziaren adierazgarri da. Donostiako Udalak, Gipuzkoako Foru Aldundiak eta enpresa-laguntzaile talde batek babestuta, kultur bikaintasunak bereizten dituen hogeitamar hitzordutik gora eskaintzen ditu Kursaal Eszenak urtez urte.
Gaurkotasuna / 9 martxoa, 2021
Eusko Jaurlaritzak argitaratutako dekretuaren arabera, Kursaalaren edukiera 600 eserlekura arte zabaltzea ahalbidetzen da. Ondorioz, Kursaal Auditorioak 600 sarrera gehiago jarri ditu salgai La Oreja De Van Gogh taldeak Kursaalen egingo dituen 3 saioetarako, aurretik agortuta zeudenak:
- 200 sarrera gehiago martxoaren 13ko 17: 00etako kontzerturako
- 200 sarrera gehiago martxoaren 13ko 19: 30tako kontzerturako
- 200 sarrera gehiago martxoaren 14an, 19: 30tako kontzerturako
Sarrerak kursaal.eus webgunean edo Kursaaleko leihatiletan salgai daude.
Gainera, gaurtik aurrera ere, perimetroko konfinamendua baliogabetuta geldituko da,Euskal Autonomia Erkidegoko lurralde osoan mugikortasun askea ahalbidetuz. Horren ondorioz, Euskadiko edozein udalerritik Donostira etorri ahal izango da kontzertura, inolako arazorik gabe.
Neurri berriei buruzko informazio gehiago ikusteko:
https://www.euskadi.eus/y22-bopv/es/bopv2/datos/2021/03/2101349a.pdf
Gaurkotasuna / 8 martxoa, 2021
Eusko Jaurlaritzak gaur, astelehena martxoak 8, argitara eman duen Dekretuak, Kursaal Auditorioko edukiera 600 eserlekuetara handitzea baimentzen du. Hau horrela, Kursaal Eszenak 400 sarrera gehiago jarriko ditu salgai ZETAk taldeak Kursaalen eskaintzekoak dituen, eta agortuta zeuden, bi kontzertuetarako:
- 200 sarrera gehiago martxoaren 19ko kontzerturako (19:00)
- 200 sarrera gehiago martxoaren 20ko kontzerturako (19:00)
Sarrerek 20€ko salneurria dute eta bihartik aurrera (asteartea, martxoak 9, goizeko 11:30etan hasita) eskuratu ahal izango dira, www.kursaal.eus web orria bitarteko dela edota Kursaaleko leihatilara gerturatuta.
Gaurkotasuna / 3 martxoa, 2021
Love of Lesbian taldea Kursaal Eszenako 2021eko denboraldian aritu da, “Viaje épico hacia la nada” biraren baitan. Indie taldea Kursaalen eskainiko du bere emanaldia urriaren 21ean.
Kontzertu honetarako sarreren salmenta laster abiatuko da eta www.kursaal.eus eta sare sozialen bidez jakinaraziko da.
Gaurkotasuna / 18 otsaila, 2021
Murrizketa soziosanitarioak gorabehera, 152 ekitaldi egin dira, eta 96.000 bertaratu baino gehiago izan dira.
Kursaalek gaur goizean aurkeztu du prentsaurrean 2020ko jardueraren balantzea, eta emaitzak oso baldintzatuak izan dira, gainerako sektoreetan bezala, Covid-19ren agerpenak eraginda. Urtea ondo hasi zen Kursaalen, aurreko ekitaldia negozio-bolumenaren errekor berri batekin ixtetik zetorren, 2018an baino% 4 gehiago, eta 1,2 milioi euroko superabitarekin. Aurreikuspenen arabera, programatutako kongresu, konbentzio eta bileren bolumenean pronostiko ona zuen, horien artean hamabost bat kongresu zeuden, horietako sei nazioartekoak, baita kultur agenda aberats bat ere.
Urtea aktibitate erritmo bikainarekin hasi zen. Urtarrilean, otsailean eta martxoko lehen astean, guztira, 33 ikuskizun burutu ziren kulturaren arloan, eta 22 ekitaldi kongresu eta konbentzioen alorrean, guztira 44.210 pertsona bertaratu ziren Kursaalera. Egindako ekitaldien artean, nabarmentzekoak dira “Basque Railway 2020” nazioarteko IV. Trenbide Jardunaldia, trenbide-arloko Europako erreferente gorenek parte hartu zutena, edo Angulas Aguinagako urteko konbentzioa, non enpresak bere talde osoa bildu baitzuen 2019an lortutako arrakastak berrikusteko. Kulturari dagokionez, aipatzekoak dira, halaber, Sergio Dalmaren kontzertuetako “sold out” ak, Rhapsody of Queen tributoa eta baita Kursaal Eszenak programatutako Los Secretos eta Javier Camarenaren kontzertuak ere.
Hasiera on honek 180º-ko bira eman zuen, koronabirusa sartu zenean eta alarma egoera indarrean jarri zenean. Egoera larri honen aurrean, martxoaren 8an, kongresu jauregiaren programazio osoa eten egin zen, eta, 3 hilabetez itxita egon ondoren, berriz ere ekitaldi berriak hartu zituen, pixkanaka, ekaineko bigarren astetik aurrera. Abiatze berri honetan, lehen hitzordua Lacunzaren ekitaldi bat izan zen, ekainaren 12an Cambridge ingeleseko azterketak burutu zirelarik. Konfinamendu-hilabeteetan zehar, deseskaladaren hirugarren fasetik irten arte, aldi horretarako programatutako ehun ekitaldi inguru atzeratu eta/edo bertan behera utzi ziren.
2020an 152 ekitaldi
Pandemiak eragindako mugak direla-eta oso urte zaila izan den arren, 2020an 152 ekitaldi egin dira, horietatik 73 bilera, konbentzio eta kongresuen kategorian eta 79 kultur ikuskizunetan. Guztira 96.349 bertaratu izan dira, 2019an baino% 52 gutxiago. Jarduera maila nabarmen murriztu denez, negozio bolumena 1,6 milioi euroraino jaitsi da, 2019an baino% 64 gutxiago. Tesitura zail honen aurrean, gastu arruntari eutsi zaio eta Kursaaleko ekosistemak egindako ahaleginari esker, 627.000 euroko diruzaintza operatiboaren defizitarekin itxi da urtea. Hala ere, aurreko urteetako emaitza ekonomiko ezin hobeei esker, ez da kanpoko finantzaketarik eskatu behar izan.
Bestalde, emaitzen balantze honi biltzar-jauregiarentzat estrategikoa den elementu bat gehitzen zaio: bezeroen gogobetetze-maila handia, galdeketetan antolatzaileek batez beste 8,8 puntu eman baitizkiote Kursaali, 2019an lortutako puntuazioa hobetuz.
Biztanleria konfinatu zen hilabeteetan, Kursaaleko ateak itxita egon ziren, nahiz eta bere barne jarduera ez zen eten. Osasun-agintarien gomendioak eta gidak jarraituz, eta arriskuak identifikatu eta aztertu ondoren, babes-neurri hertsiak ezarri ziren zerbitzu eta instalazioetan. Horretarako, protokolo espezifikoak prestatu ziren pertsonen segurtasuna eta osasuna bermatzeko, bai bileretarako bai kultura-ekitaldietarako. Era berean, irtenbide teknologikoak diseinatu ziren topaketa-eredu berriak eskaintzeko eta esperientzia onena sortzeko, bai ekitaldi presentzialetan, bai hibridoetan.
Era berean, eraikina egokitzeko eta hobetzeko hainbat lan egin ziren itxiturak iraun zuen bitartean, jarduera-baldintza normaletan egitea zailagoak izango liratekeen lanak. Besteak beste, foyerraren eta bilera-gelen zorua leundu eta bernizatu zen, erabilera anitzeko geletako halleko zura berritu zen, agertokiko maskor akustikoaren egituraren zati bat motorizatu da eta aparkalekuko igogailuak ordeztu dira. Era berean, hobekuntzak egin dira klimatizazio-sisteman, aire segurua% 100 berritzen dela ziurtatzeko, beste mantentze- eta berritze-lan batzuekin batera; hori guztia, guztira, 440.974 euroko inbertsioarekin. Inbertsio plan horrek 2021ean jarraituko du; izan ere, inoiz baino gehiago, beharrezkoa da jauregiaren “Premium-aditua” posizionamendua mantentzen eta indartzen jarraitzea.
Errealitate berrira egokitutako ekitaldien eredu berriak
Ekainean jarduera berreskuratu ondoren Kursaalek egin zituen ahaleginak espazioen eta protokoloen egokitzapenean oinarritu ziren, bai eta ekitaldien formatuen egokitzapenean ere, une oro bezero bakoitzaren beharretara egokituz. Hastapen berri honetan, ekitaldi hibridoak funtsezko elementuak izan dira; izan ere, aretoen edukieraren murrizketek asko mugatu dituzte ekitaldiak, eta streaming bidezko emanaldiak sartzeak audientzia handitzea ahalbidetu du.
Horren adibide ona izan zen “los Días C 2020” Club de Creativosen biltzarra, aurten ere Kursaalen egin zena, baina edizio honetan formatu berezi batean, parte hartzeko eta bertaratzeko oztoporik egon ez zedin diseinatuta, streaming eta presentziazko nahasketa batekin. Urriaren 8an eta 9an, ekitaldia osorik streaming bidez egin zen, auditoriumeko agertokitik zuzenean emandako hitzaldiekin, eta 10. egunean Sormen Sari Nazionalen gala egin zen aurrez aurre, nahiz eta online ere jarraitu ahal izan zen. Era berean, APD, Zuzendaritzaren Aurrerapenerako Elkartea eta BSK Legal & Fiscal taldeek formatu hibridoan eta online egin zituzten jardunaldiak, hurrenez hurren.
2020ko bilera-ekitaldien arloan, segmentu garrantzitsu bat azterketak eta hautaketa-probak izan dira, eta horiek segurtasun osoz egin ziren, jauregiko espazioen zabaltasunari eta ezarritako segurtasun- eta higiene-protokoloei esker. Joan den urtean, Kursaalean izan dira Lacunzak antolatutako Cambridge ingeleseko azterketak, HABEren hizkuntza-eskakizuneko probak eta Gipuzkoako Foru Aldundiaren Lan Eskaintza Publikoetako hautaketa-probak. Guztira, 2.608 pertsona bertaratu dira.
Covid-19tik eratorritako murrizketek kongresu, konbentzio eta azoken segmentua gehien kaltetu duten arren, horietako hamar inguru ospatu ziren, besteak beste, Top 100+ Medical Laser Congress, aurten Kursaalen 6. kongresua egin duena, Sormen Klubaren kongresua, Reale Seguros eta Angulas Aguinagaren konbentzioak edo Sportjam azoka.
Horrek guztiak 8 milioi euroko inpaktu ekonomikoa eragin du Gipuzkoan, 2019ko 52 milioien aldean, aurrez aurrekoak ez diren ekitaldiek lurraldean duten inpaktu eskasaren ondorioz.
Kultura: udako protagonista nagusia
Kultura izan da, zalantzarik gabe, udako protagonista nagusia. Covid-19k markatutako uda atipikoan hiru jaialdi handiak ospatzeak sendotu egin du kulturak Donostian duen garrantzia.
55 Jazzaldiarekin hasi zen kultur eskaintza, eta Kursaala bizitzaz bete zen berriro. Aurreko edizioan 3 kontzertu eman ziren Auditoriumean, eta 23 Kursaaleko terrazetan. Guztira, 7.032 lagun bertaratu ziren. Musika hamabostaldiak, 81. edizioan bere programazioa eta agertokiak errealitate berrira egokitu behar izan zituenak, Kursaal Auditorioan bere ziklo sinfonikoa eskaintzen jarraitu du. Edizio honetan, 3.000 ikusle inguruk 5 hitzordu izan zituzten Kursaalen, horietatik 2 nazioartekoak. Zinemaldiak amaiera eman zien jaialdiei, eta egindako ekitaldien segurtasun maila handia berretsi zuen, horien inguruko agerraldirik deitoratu behar izan gabe. Kongresu-jauregiak Donostia Zinemaldiaren 68. edizioan, 76 zinema-emanaldi eta 71 ekitaldi hartu zituen; horien artean, prentsaurrekoak, aurkezpenak, sari-banaketak eta elkarrizketak, 22.110 parte-hartzaile guztira.
Aipatzekoak dira, halaber, Get In bezalako sustatzaile pribatuek antolatutako udako kontzertuak, ziurgabetasun eta egoera aldakorraren aurrean kultur-industria bizirik mantentzearen aldeko apustua egiten jarraitu baitzuten.
Publikoaren erantzun bikaina
Kulturaren arloan, aipagarria izan da ikus-entzuleen erantzun bikaina, bai eta kontzertu askotan egin behar izan den egokitzapena eta artistek erakutsitako malgutasuna ere, Izaroren kasuan, adibidez. Hasiera batean, Donostian bizi den artista bizkaitarrak bi kontzertu eman behar zituen martxoan, sarrera guztiak salduta zeudelarik. Hitzordua hainbat aldiz atzeratu ondoren, azkenean kontzertuak azaroan egin ziren, baina unean uneko 400 eserlekuren edukiera mugatuta zegoenez, bi saioetatik seiraino gehitu ziren.
Guztira 79 kontzertu eta 81.811 etorle izan ziren, horietatik 21 Kursaal Eszena programazioaren proposamenak. Horien artean, 10 “sold out” nabarmendu behar dira; Izaroren kontzertuetako 4tan, Xabier Leteren omenezko “Heziak urraturik” kontzertuko 2 saioetan, Labéque ahizpen kontzertuetako batean, baita Javier Camarena, Los Secretos eta “Maitasun epikoak” haurren kontzertuetan ere. Gainera, “Don Giovanni” opera antzeztu zen Opus Lírica konpainiaren eskutik.
Kursaal Eszenak, edukiera murrizteak eragindako eragozpenak eta mugak gorabehera, kultur eskaintza anitzari eustea lortu du; izan ere, Kursaaleko auditoriumaren kasuan, urritik aurrera, edukieraren% 22 hartzen du, eta guztira 14.576 etorle erakartzea lortu du 2020an. Gainera, bi enpresa babesle berri sartu dira, Eitb eta Arrizul Hoteles. Babesle pribatuen eta erakundeen laguntzari esker, inoiz baino gehiago izan da posible herritarrei kultur eskaintza aberatsa eskaintzen jarraitzea.
Kursaaleko agertokietan programatzen duten sustatzaile pribatuek ez ahazteko moduko kontzertuak ekarri zituzten; besteak beste, artista hauenak: Viva Suedia, Coque Malla, Ara Malikian, Andres Suarez edo Sergio Dalma. The Beatles Tribute, Abba Tribute, Rhapsody of Queen, Mecano eta Supertramp bezalako musikal eta tributuekin ere gozatu ahal izan zen.
Bestalde, Alizia musikalak, Donostia Vive la Magiak edota Pirritx, Porrotx eta Marimototsen haurrentzako ikuskizunak erabat bete zuten Kursaal familiez.
Eta, ohi denez, ikuskizun horiei Euskadiko Orkestraren abonu-denboraldikoak gehitu behar zaizkie. Urte zaila izan da Euskadiko orkestrarentzat ere; izan ere, urteko bigarren hiruhilekoko kontzertuak bertan behera utzi behar izan ditu, eta udazkenari aurrera jarraitzeko konpromisoarekin aurre egin dio, antolakuntzan ahalegin handia egin du, eta programazioa, ordutegiak eta programak berriz diseinatu behar izan ditu, eta saioen kopurua handitu du abonatu guztiengana eta publiko orokorrarengana iristeko.
Miramar Jauregiaren kudeaketa
Kursaal Elkarguneak 2020an izan duen gertaera gogoangarrietako bat Miramar Jauregiaren kudeaketa izan da. Miramar Jauregi Partzuergoak, Donostiako Udalaren, Gipuzkoako Foru Aldundiaren eta Eusko Jaurlaritzaren partaidetza duen sektore publikoko erakundeak, ekainean berritu zuen eraikina 20 urtez erabiltzeko emakida. Eta irailean, Partzuergoaren eta Kursaal Zentroaren arteko lankidetza-hitzarmena sinatu zen, zeinaren bidez azken horrek bere gain hartzen baitu Jauregiaren kudeaketa, kultura-jarduerak egiteko eta Donostiaren, Gipuzkoaren eta Euskal Autonomia Erkidegoaren aberastasuna eta irudia indartuko duten biltzarrak, konbentzioak, ekitaldiak eta ekitaldiak egiteko, pertsonak erakartzeko eta inguruneari balio erantsia emateko jarduera sortuz, bai ekonomikoa bai ezagutzakoa.
Kursaalen lankidetza kultura- eta kongresu-jardueraren kudeaketan duen esperientzian oinarritzen da, hogei urte baino gehiagoko ibilbide arrakastatsuak bermatua.
2021 jardueraren suspertzea
2021era begira, jarduera pixkanaka suspertzea espero da, betiere bilakaera soziosanitarioaren eta aplikatutako edukiera-murrizketen arabera. Orain arte, 6 kongresu daude programatuta aurten, horietatik bat nazioartekoa.
- Euskal Herriko eta Nafarroako Hematologia eta Hemoterapia Elkartearen (Asovasna) XXVII. Urteko Biltzarra
- Club de Creativos
- LHko Nazioarteko Kongresua
- Obesitatearen Kirurgiako Espainiako Elkartearen XXII. Biltzar Nazionala
- San Sebastián Gastronomika 2021
- Espondiolartritis Sinposioa
Gaurkotasuna / 16 otsaila, 2021
Gaur egun Europa mailako bi musika talde nabarmen diren hauek saio bikoitza eskainiko dute (17:00 eta 19:30etan ) martxoaren 8an
Kursaal Eszenaren kontzertu denboraldiak, musika klasikoari eskainitako atalean, Marin Alsop estatubatuarrak zuzentzen duen Radio Symphonieorchester Wien-en emanaldia aurreikusten zuen datorren martxoaren 8rako. COVID-19aren krisialdiak eragindako murrizketa ezberdinen ondorioz, kontzertu hori, ordea, ez da egingo eta bere ordez beste hitzordu bat programatu du Kursaal Eszenak; hala, gaur gaurkoz antzinako musikan espezialdutako ahots-talderik hoberenetakoa den Vox Luminis, eta Alemaniako ganbera-formazio handietako bat, Freiburger BarockConsort, izango dira Kursaaleko agertokian.
Martxoaren 8ko astelehenez saio bikoitzean, 17:00etan eta 19:30etan, eskainiko den kontzertu honen programak bi konposagile izango ditu ardatz; Errenazimentua eta Barrokoaren artean zubi lanak egiten dituzten Steffani eta Biber maisuak hain zuzen ere. “Stabat Mater” obrak, Steffani-ren maisulana denak, Italiako konposagilearen debozioa islatzen du. Biber-en “Requiem-a fa minorren”, berriz, barroko aldiko konposiziorik hunkigarri eta ederrenetakotzat jotzen da.
Radio Symphonieorchester Wien-en kontzerturako gaurdaino erositako sarrerak ez dira baliozkoak izango Kursaal Eszenaren hitzordu berri honetarako, eta sarrera horien zenbatekoa itzuli egingo da (itzulketa automatikoki egingo da, sarrerak Internetez erosiak izan badira. Euren sarrerak leihatilan eskuratu zituzten lagunek, berriz, 943 00 31 70 zenbakia deituko beharko dute itzulketa gauzatzeko).
Hau horrela, Vox Luminis & Freiburger BarockConsort-en kontzertura etortzeko interesa dutenek sarrerak erosi beharko dituzte www.kursaal.eus web orria bitarteko dela, edota Kursaaleko leihatilara gerturatuta. Sarreren prezioa 45/36/29/23€koa izango da, zonaldearen arabera.
VOX LUMINIS &
FREIBURGER BAROCKCONSORT
KURSAAL Auditorioa
Martxoak 8, astelehena, 17:00 / 19:30
45 / 36 / 29 / 23 €
