CFAH ekaina 2021 - Kursaal Donostia - San Sebastián Kursaal Donostia – San Sebastián

Segurtasun neurriak Covid-19aren aurrean

cerrar

Maskara erabiltzea derrigorrezkoa da uneoro, sarreran, irteeran eta ikuskizunean zehar.

Sarreran derrigorrezkoa izango da bertan egongo den gel hidroalkoholikoarekin eskuak garbitzea

Errespetatu segurtasun-distantzia eta bete aretoko langileen jarraibideak eraikinera sartzeko eta irteteko.

Ikuskizunetara behar besteko aurrerapenarekin etortzea gomendatzen da.

Ikusleak eserlekuetan eserita egon behar dute ikuskizun osoan zehar.

menu

Nathy Peluso, Love of Lesbian eta Amaralen kontzertuetarako sarreren salmenta gaur jarri du abian Kursaal Eszenak

Gaurkotasuna / 30 ekaina, 2021

Kursaal Eszenaren hurrengo denboraldian Donostiako oholtzara igoko diren artisten kontzertuetatik hiruren sarrerak eskura ditzakete zaleek

Amaralen kontzertua izango da hiruetatik lehena, urriaren 10ean, igandea, 2020. urteko egitarauan taldearen kontzertua Covid-19agatik bi bider atzeratu ondoren. Nathy Peluso argentinarraren txanda izango da jarraian, urriaren 12an, asteartearekin. Love of Lesbian taldea, aurretiaz iragarri bezala, urriaren 21eko ostegunean helduko da Donostiara.

Eva Amaral eta Juan Aguirre “Salto al color” izeneko  lana aurkezteko itzuliko dira Kursaalera. Zaragozako taldeak honela deskribatu du estudioan grabatutako zortzigarren diskoa: “kolore soinudunezko ozeanoan murgilaldia, non zura eta metala, bihotza eta azala, gorputza, arima eta bizitzeko poztasuna bizikide diren”. Indarra, konplizitatea, dantza eta emozioa bermatuta egongo dira Amaral taldekoek emango duten kontzertuan.

Nathy Peluso argentinarrak oso bestelakoak diren doinuak ekarriko ditu Donostiara bere azken birari izena ematen dion “Calambre” diskoarekin. Abangoardia latinoamerikarra ulertzeko ezinbestekoa den musikariak hip-hopa, 2000. hamarkadako neo soula eta musika latinoamerikarra uztartzen ditu, entzuleei sentsazio sorta eskainiz, antzezlan baten aurrean baleude bezala.

Bi dira jada Love of Lesbianek musikari emandako hamarkadak eta ibilbide horretan Espainiako poparen ikur bilakatu da taldea. 2021ean “El poeta Halley” diskoaren jarraipena kaleratu dute, “V.E.H.N.” (Viaje épico hacia la nada) izenekoa, Kursaaleko oholtzara ekarriko dutena: “antidoto sendatzailea, bidaia gogoetatsua eta zuzeneko musikarekin berriz topo egiteko promesa” Mondosonoro aldizkariaren hitzetan.

AMARAL
2021eko Urriak 10, igandea / 19:00
Kursaal Auditorioa
45 €
Sarrerak erosi

NATHY PELUSO
2021eko Urriak 12, asteartea / 19:00
Kursaal Auditorioa
35 €
Sarrerak erosi

LOVE OF LESBIAN
2021eko Urriak 21, osteguna / 20:00
Kursaal Auditorioa
40 €
Sarrerak erosi

Iseo & Dodosound bikoteak itxiko du Kursaal Eszenaren denboraldia

Gaurkotasuna / 17 ekaina, 2021

Ekainaren 20ko igandean Kursaal Auditorioan arituko dira bi bider, 17:30ean eta 20:00etan

Iseo & Dodosound bikote nafarra Donostiako Kursaalen arituko da udako solstizioaren bezperan, ekainaren 20an, Kursaal Eszenaren denboraldiari amaiera emanez. Euren “Inédito Tour” kontzertu-sortari dagokion ikuskizunaren bi saio emango dituzte, 17:30ean lehena eta 20:00etan bigarrena.

Astelehenean entzun ahal izan genuen lehen aldiz, Radio3 irratiko Siglo 21 saioan, gaur bertan plataforma digitaletan entzungai jarriko duten “Arigato”, luze gabe argitaratuko duten estudioko hirugarren lan luzearen aurrerapen kantua: eleanitza, igaro diren oholtzei gorazarre egiten diena, eta estilo nahiz etiketen gainetik musikaren indarra aldarrikatzen duena.

Hain zuzen, Leire Villanuevak eta Alberto Iriartek zuzenean aurkeztuko dituzte lantzen aritu diren kantuak, diskoa kaleratu aurretik. Kantu berri horiek lehen aldiz entzuteko aukera emango duen “Inédito Tour” deritzon bira oso hiri gutxitara helduko da eta Donostia da horietako lehena. Eszenatokian, Iseo & Dodosoundek lagun izango dute The Mousehunters taldea. Ohikoa dute haize talde horren lankidetza eta oraingo honetan ahalegin berezia egin dute horien laguntzaz hirugarren diskoko doinuak modu esklusiboan bere jarraitzaileei aurkezteko.

Iseo & Dodosound bikoteak 2014an ekin zion bere ibilbideari. Askotarikoak dira lantzen dituzten musika estiloak. Urteotan bi disko kaleratu ditu, “Cat Platoon” (2015) eta “Roots in the Air” (2017) eta orain aurkeztuko dituen doinu berriak izango dira sortu berri duten Twin Cats Records zigilupean plazaratuko duten estudioko lana osatuko dutenak.

Ekainaren 20an, igandea, Kursaal Auditorioan emango dituzten bi emanaldietarako sarrerek 22 €ko salneurria dute eta www.kursaal.eus webgunean edo Kursaaleko leihatilan eskura daitezke.

Iseo & Dodosound
Kursaal Auditorioa
Ekainaren 20 igandea, 17:30
Ekainaren 20 igandea, 20:00
22 €

Erosi sarrerak 17:30erako

Erosi sarrerak 20:00etarako

Venice Baroque Orchestrak Kursaalera dakartza Vivaldiren “Lau urtaroak”

Gaurkotasuna / 10 ekaina, 2021

Ekainaren 13an, igandearekin, kursaal Eszenaren baitako bi emanalditan, Gianpiero Zanoccok zuzenduta eta Chouchane Siranossian biolinista bakarlari dela

Ekainaren 13an, igandearekin, Venice Baroque Orchestra, interpretazio historizistaren alorrean nazioarte mailako orkestrarik nagusienetakoa estreinako aldiz ariko da Kursaal Eszenak musika klasikoari eskaintzen dion atalean. Egun berean izango diren bi emanaldietan musikaren historiako obrarik ospetsuenetakoa interpretatuko du: Antonio Vivaldiren “Lau urtaroak”. Gianpiero Zanoccoren zuzendaritzapean eta Chouchane Siranossian biolinista lagun duela, Francesco Geminianiren Concerto grosso nº 12, “La Follia” interpretatuko dute atariko guisa.

1997an Andrea Marconek sortua, Venice Baroque Orchestrak lan egiten du XVII eta XVIII mendeko lanak berreskuratzen. Testuinguru horretan, estreinatu ditu Francesco Cavalliren L’Orione, Vivaldiren Atenaide, Benedetto Marcelloren La morte d’Adone eta Boccheriniren Il trionfo della poesia e della musica eta La Clementina. Mundu mailan historizismoaren baitako orkestra azpimarrgarienen gisa aitortua,  hainbat bira egin du Europa, EEBB eta Asian barrena Philippe Jaroussky kontratenorrarekin; kontzertuak Marie-Nicole Lemieux kontraltoarekin Frantzian eta Belgikan; emanaldiak Kroazia, Alemania, Espainia, Frantzia, Mexiko, EEBB eta Kanadan, eta bira bat egin zuen Magdalena Kožená mezzosopranoarekin, eta Istambuleko Jaialdian eta San Petersgurgoko Mariinsky Antzokian aritu ziren. Gianpiero Zanocco, Kursaaleko emanaldietan kontzertino eta zuzendari ariko dena, 2003tik da orkestrako kide eta, horrezaz gain lankide aritu da beste hainbat orkestrekin: L‘Arte dell’arco, I Solisti Italiani, Fenice di Venezia, Filarmonia Veneta eta abar.

Chouchane Siranossian Barrokoko errepertorioan bereiztutako biolinista nagusienetako da egun nazioartean eta bakarlari gisa nahiz orkestra ugarirekin lankidetzan aritzen da. Aipagarri da, halaber, egungo musikagileekin batera lankidetza, esaterako Daniel Schnyder, Marc-André Dalbavie, Michael Rosin, Bechara El-Khoury, Éric Tanguy, Benjamin Attahir edo Thomas Demengarekin. 2015ean sortuko Esperanza taldearen buru da eta 2018an Opus Classic sari bat eskuratu zuen horrekin batera. Etorkizunerako proiektuen artean, 21/22 denboraldirako bira bat aurreikusita du Les Siècles talde frantziarrarekin bakarlari gisa. Venice Baroque Orchestraren lankide gisa, 2019an Tartiniren kontzertuak grabatu zituen Alpha Classic zigilupean.

Venice Baroque Orchestrak ekainaren 13an, igandearekin, Kursaalen emango dituen bi kontzertuetarako (17:00etan eta 19:30etan) sarrerak eros daitezke www.kursaal.eus webgunean eta Kursaaleko leihatilan.

Espainiako Kongresu Jauregien Elkartearen (APCE) lehen workshopa egin da Kursaalen

Gaurkotasuna / 4 ekaina, 2021

Espainiako Biltzar Jauregien Elkartearen (APCE) lehen Workshopa ospatu da Kursaalen ekainaren 3 eta 4ean. Biltzarretako turismoaren alorreko bilara honen helburua Biltzar Jauregien kalitate-zigiluari balioa ematea izan da elementu bereizle gisa, bai eta ezagutza- eta negozio-sare bat sortzea ere, kide diren jauregien artean merkaturatzeko eta biltzarrak erakartzeko lana errazteko.

Gipuzkoako hiriburua, Espainiako zenbait biltzar-jauregik parte hartu duten topaketa profesional garrantzitsu honen egoitza izan da. Besteak beste, Valentziako, Kanariar Uharteetako, Malagako, Coruñako, Salamancako, Granadako edo eta Madrilgo biltzar-jauregiek eta biltzarrak antolatzen dituzten elkarteen ordezkariek parte hartu dute. Kongresu horiek oso irizpide espezifikoak eta zorrotzak bete behar dituzte, eta, era berean, kongresuen ordezkariek erakutsi behar dute erabakitzeko gaitasuna eta eragina dutela etorkizuneko edizioen destinoak zehazteko orduan.

Topaketa honetan Kursaal eta Donostia bertatik bertara ezagutzeko aukera izan dute. Horretarako, egitarau zabala bat prestatu da. Hasteko, hiriaren aurkezpena egin du Cristina Lagé Turismo Iraunkorreko zinegotziak. Ondoren, parte-hartzaileek hiriko hainbat kokaleku enblematiko bisitatu dituzte, Santa Klara uhartean kokatuta dagoen Cristina Iglesias artista donostiarraren Hondalea lana barne, eta euskal gastronomia dastatzeko aukera ere izan dute.

APCE

Espainiako Biltzar Jauregien Elkartea 1995ean sortu zen, eta Iker Goikoetxea, Kursaaleko zuzendari gerenteak sostengatzen du gaur egun lehendakaritza. Elkarte honen asmoa Biltzar Jauregiak espazio fisiko eta antolaketa-egitura gisa duen garrantzia nabarmentzeko ekintza komunak abian jartzea da, eta Espainiako biltzar eta bileretako turismoaren ardatz egituratzaile gisa jardutea. Era berean, garatutako jardueraren berezko gaiei buruzko esperientziak eta ideiak trukatzea ahalbidetu nahi du, bai eta administrazio eskudunekin proposamenak, kontsultak eta akordioak egitea ere. Gaur egun, 33 Kongresu Jauregiren Elkarteko kide dira.

Euskal Barrokensemblek “Subh, Al–Andalus gobernatu zuen emakumezko esklabo baskoia” estreinatuko du ekainaren 9an Kursaalen

Gaurkotasuna / 4 ekaina, 2021

Bi emanaldi izango dira, Kursaal Eszenaren Klasikako programazioan

Ekainaren 9an, asteazkenarekin, Euskal Barrokensemblek, Enrike Solinis zuzendari duen antzinako musika taldeak Kursaal Eszenaren programazioaren baitan gauzatuko du euren azken lanaren erabateko estreinaldia: “Subh, Al–Andalus gobernatu zuen emakumezko esklabo baskoia”. Bi emanaldi izango dira, 17:00etan eta 19:30etan.

Proiektu horrek musika, kantu flamenkoa, dantza, narrazioa, kantua eta bertsolaritza uztartzen ditu pertsonaia historiko baten nondik norakoa marrazteko. Subh da pertsonaia hori. Emakume baskoi hori esklabo zela iritsi zen Al-Andalusera eta, ziur asko bere musika eta literatura ezagutza sakonak medio, Al-Hakam II kalifaren begiko bihurtu eta andere handi izendatu zuten; ondoren, kalifaren seme zaharrenaren, Hishamen ama izanagatik erregina izan zen. Hogei bat urtean, 976tik 996ra, kalifatoa gobernatu zuen eta Almanzor-i berari ere aurre egin zion, bere semearen herentzia babesteko asmoz betiere; izan ere, horretarako adina nortasunik ez zuelako edo gaixotasunen zuelako, Hisham ez zen kalifatoa bere kabuz gobernatzeko gai izan. Hartara, Subh, esklabo baskoia kalifatoaren historian protagonista izan zen, Almanzor-ek agintaritzatik baztertu zuen arte; Almanzor handik urte gutxira zendu eta kalifatoa taifa txikitan banatzeak horren gainbehera ekarri zuen.

Al-Andalus-en historiaren baitan kokatutako Subhen historia kontatzeko, Euskal Barrokensemblek eta Enrike Solinisek askotariko diziplinak biltzen dituen ikuskizuna sortu dute eta, garaiko musika testuingurua islatzeko, alor desberdinetako artistak hartu dituzte bidelagun. Aro hartan, orduko errealitatearen ildotik, musika kultura anitzek bat egin zuten; horien artean, arabiarraren eta judu-kristauaren bat egitetik sortu zen musika andalusia, XI eta XII. mendeetan garatu zena. Publikoak Subh, esklabo baskoiaren historia errazago jarrai dezan, Mikel Zuzak hautatutako testuak baliatu dituzte.

Euskal Barronsemblerekin batera eta Enrike Solinisen zuzendaritza artistikoaren pean (giterna eta laud andalusia jotzearekin batera), ikuskizunean ariko dira Warda Mallal andalusi dantza bikotea, Bilaka Dantza Kolektiboa, Rosario La Tremendita flamenko-kantaria, Josean Bengoetxea, narratzaile lanetan; Julio Soto bertsolaria eta Capilla Wasconiae abesbatza.

Enrike Solinisek, antzinako musikan bereiztutako bilbotar musikariak 2006. urtean sortu zuen Euskal Barrokensemble. Estilo ezberdinetan adituak diren musikariek osatzen duten taldea da eta, zeharkakotasuna oinarri hartuta, Errenazimenduko, Barrokoko eta XX. mendeko musikak interpretatzen eta birsortzen dituzte, arreta berezia jarriz ahozko tradizioaren bidez transmititutako musikatan. Euren proiektu berriztatzaileetan, birsortzearekin batera inprobisazioari tartea egiten diote (“Colores del Sur, baroque dances for guitar”,  “Euskel Antiqva, le legs musical du Pays Basque”, “El Amor Brujo, esencias de la música de Manuel de Falla). Nazioarte mailan aitortua, honakoetan izan da, besteak beste: Vienako Konzerthaus, Ludwigsburgeko Jaialdia, Stockholm Early Music Festival jaialdia, Spring Festival Prague, Bilboko Musika-Música, Musika Hamabostaldia, Madrilgo Auditorio Nazioanala eta Brujaseko Konzertgebouw.

Erabateko estreinaldi horren bi saioetarako sarrerak eros daitezke www.kursaal.eus webgunean eta Kursaaleko leihatilan.