menu

Kursaal Eszenak Haendelen “Mesias” eskainiko du, Eguberrien atariko gisa

Gaurkotasuna / 15 abendua, 2017

Etengabe interpretatu da obra hau, eta gizadiaren ondarearen parte da 

Datorren larunbatean (abenduak 16, 20:00etan), The King’s Consort talde prestigiotsuak “Mesias”en interpretazioa eskainiko du, musika erlijiosoaren maisulana dena. 1741urtean sortua, pasio eta kantata zahar alemaniarren tradizioan ditu sustraiak. Izan ere, Alemania da Georg Friedrich Haendelen sorterria, nahiz eta beste musikari askok bezala, Ingalaterra hartu zuen adopzio-herritzat. Hasieran halako arrakasta bat izan zuen bere opera italiarrekin, baina aitorpena ez zitzaion heldu bere eliz obra handiak egin zituen arte.

Charles Jennens-ek idatzi zuen testua, eta urte hartan bidali zion libretoa Haendeli ingelesezko oratorio bat osa zezan: kantu bat da, eta Jainkoaren eta gizakiaren arteko harremanari buruzko hausnarketa, eta Erredentzioaren misterioaren gaia ere lantzen du.

“Mesias” lana, 24 egunetan konposatu zuen Haendelek, eta 1742an estreinatu zen Dublingo New Music Hall-en, hainbat presoren eta era guztietako gaixoen aldeko ongintzazko emanaldi batean. Halako arrakasta izan zuen, non Londresen estreinatu baino lehen zenbait aldiz interpretatu baitzen Irlandan, baina Londresen ez zuen halako harrera berorik izan.  Harrezkero etengabe interpretatu izan da, eta gizadiaren ondarearen parte da.

The Kings´ Consort taldea Robert Kingek fundatu zuen 1980an, eta, diotenez, mundu osoko instrumentu zaharrekiko orkestra nagusietako bat da. Itzuliak egin ditu bost kontinentetan barna eta ohikoa da herrialde gehienetan. Hiru hamarraldiz baino gehiagoz aurkeztu du bere errepertorio zabala, 1550eko obretatik hasi eta gaurko obretara heltzen dena, munduko musika-areto nagusietan. Bere sortzailea, Robert King, bere belaunaldiko britainiar zuzendari handienetako bat da. Musika barrokoaren interpretazioan dago espezializatua, baina asko lantzen ditu halaber obra klasikoak eta lehen erromantizismokoak, izan obra sinfonikoak nahiz ahozkoak

THE KING´S CONSORT
“Mesías”, G.F. Haendel
Robert King, zuzendaria
Abenduak 16 larunbata / 20:00
50 / 40 / 32/ 26 / 12 € 

 Sarrerak erosi

2018ko denboraldi berrian, Kursaal Eszenak molde ezberdineko 14 musika-hitzordu eskainiko ditu

Gaurkotasuna / 1 abendua, 2017

Kursaal Eszenak dozenatik gora kontzertu atondu ditu bere denboraldi berrirako. Denboraldia otsailaren 3an hasiko da, familia giroko “Pierrot” proposamenarekin. Bertan jolasa, dantza, pantomima eta Britten, Beethoven edo Xostakovitx bezalako konposagile ezberdinen musika elkar nahasiko dira, Commedia dell´Arteko giroa gogoraraziz. Denboraldiko lehen hitzordu honetako protagonistak, EOSeko talde instrumental bat eta Dantzertiko Arte Dramatiko eta Dantzako ikasleak izango dira.
Egun batzuk beranduago (otsailak 17), Italiako Europa Galante taldea iritsiko da Kursaal Auditoriora. Fabio Biondi biolin-jotzaileak zuzentzen duen eta barroko garaiko errepertorioan ezpezialdua den formazio honek, historiako aldi guztietan musikatuena izan den erlijiozko testua, “Stabat Mater”a, eskainiko du. Aipatu obra G.B. Pergolesik XVIII.mendeko lehen erdian egin zuen bertsioarekin iritsi zen bere gorengo mailara, eta bertsio hori izango da, hain zuzen ere, Italiarrek interpretatuko dutena.
Denboraldi berriko esparru klasikoan, Pucciniren “La Bohème” opera ezagunaz gozatzeko aukera ere izango da, Opus Lirica konpainiaren produkzio berriari esker (martxoak 2 eta 4). Mimiren rol nagusia interpretatutako duen Ainhoa Garmendiarekin batera, Helena Orcoyen edo Jagoba Fadriqueren neurriko beste hainbat bertako abeslari ere agertzen dira bakarlarien zerrendan. Donostiako konpainiaren proposamen berriak, joie de vivre eta tuberkulosiaren drama artean mugitzen diren artistez betetako Paris batetara eramango gaitu.
Opera eta gero, Kursaal Auditorioak beste hainbat hitzordu “klasiko” izango ditu: Jordi Savall, antzinako musikaren ordezkari nagusienetako bat dena, berak sortutako bi formazioarekin batera etorriko da “Esklabotzaren ibilbideak” izeneko programa eskaintzeko (martxoak 7). Bertan Mexiko, Kolonbia, Brasil, Mali edo Madagaskar bezalako herrialdeetako musika tradizionala aztertzen du artista katalanak. Europako orkestrarik garrantzitsu eta esanguratsuenetako bat den Zuricheko Tonhalle Orkestrak, berriz, Lionel Bringuier gazteak zuzenduta, Berliozen “Sinfonia fantastikoa” txalotua interpretatuko du (apirilak 17).
Scottish Chamber Orchestrak azkenik, Mozartek pianorako idatzi zituen bi kontzertu ezagunenetakoak aurkeztuko dizkigu, gaur egungo pianista interesgarrienetako bat den Piotr Anderszewkirekin batera (maiatzak 20).
Musika klasikoari dagokion atala Euskal Barrokensemble taldearen egitasmo berriarekin, “Juan Sebastián Elkano: euskal nabigazioaren Urrezko Aldiko kantu eta dantzak” izenekoarekin, osatuko da (ekainak 3). Enrike Solinis gitarra-jotzaileak zuzentzen duen taldeak Orfeoi Txiki Abesbatzaren laguntzarekin eskainiko du, euskal nabigazioaren osperik handieneko aldiari dagokion errepertorioa, kontinente desberdinetako ahozko tradiziozko musika eta testuak miatuz.
Apocalypticaren emanaldia, musika sinfonikoa eta rockaren arteko eremuan kokatzen da. Metal sinfonikoko banda hau, hard-rock nahiz heavy-metaleko abestiak biolontxeloz jotzeagatik egin da ezagun. “Plays Metallica by four cellos” izeneko bere lehen albuma argitaratu zuenetik bi hamarkada bete diren honetan, Finlandiako bandak hogei urteko ibilbidean lortu dituen arrakasta handiak errepasatuko ditu (apirilak 8).
Indie Folkeko Fleet Foxes taldeak, berriz, bere estudioko hirugarren lana aurkeztuko du (uztailak 10). Disko hau, 2011an argitaratu zen eta Fleet Foxes Estatu Batuetako herri-musika garaikideko talderik garrantzitsuenetako bat bezala bermatu zuen “Helplessness Blues” lanaren jarraipena da.
Oreka TX euskal txalapartari bikotea “Tosta banda”ren partaide lez ariko da. Hizkuntza gutxituak dituzten herrialde eta kultura ezberdinetako hamar artista biltzen ditu aipatu bandak, kultura horietako abesti tradizionalak birsortu eta berrinterpretzeko helburuz. Hala, Eskozia, Frisia, Gales, Kornualles, Galizia, Irlanda eta Euskadiko instrumentu, estilo eta erritmo ezberdinek bat egingo dute, indar bisual eta musikal handiko kontzertu-ikuskizun honetan (apirilak 28). Dantzak ere izango du lekurik “Tosta”n, Kukaiko bi dantzari eta Kornualleseko dantzari zelta baten partehartzeari esker.
Kursaal Eszenaren denboraldi berriko eskaintza, aparteko bi emakumezkoren, Lila Downs (ekainak 27) eta Silvia Pérez Cruzen (maiatzak 22) emanaldiekin osatuko da. Abeslari mexikarrak “Salón, lágrimas y deseo” izeneko bere hamabigarren albuma aukeztuko du. Bertan, bere ahots ikaragarria eta interpretatzeko duen orijinaltasuna bitarteko direla, bluesa, cumbia edo danzoia bezalako musika-moldeak elkar korapilatzen dira, musika-kontzeptu paregabea sortuz. Calella de Palafrugelleko konposagileak, berriz, “Vestida de nit” izeneko bere lan berria aurkeztuko du non, harizko boskote batez lagunduta, oso pertsonalak diren hainbat abesti interpretatzen dituen.
Musika Familian titulupean etxeko txiki nahiz gazteentzat prestatzen den ohizko programazioa, azkenik, hasieran aipatutako “Pierrot” proposamenak (otsailak 3) eta beste erreferentzia batek, “Beethoven: Pastorala” izenekoak osatuko dute (maiatzak 9 eta 10). Azken hau, denboraldi honetan hasita Kursaal Eszenak, Euskadiko Orkestrarekin elkarlanean, eskainiko dituen Estola Saioen baitan egingo da.
Kontzertua atal ezberdinetan antolatuko da eta, atal bakoitzean, Beethovenen “pastorala” obraren melodía eta esaldi ezberdinak aztertuko dira. Saioa amaiatzeko mugimendu bakoitza, osorik, entzungo dute ikasleek.
Kursaal Eszenako denboraldi berriko hitzordu guzti hauen aurretik, urtarrilaren 15ean
Yuja Wang txinatar pianista famatua izango da Kursaal Auditorioan. Europa osoko musikariek osaturiko ganbera-orkestra batekin, aurreneko aldiz arituko da Wang Donostian.

Lista Spotify Música Clásica:

Lista Spotify Música Popular:


Abonuak eta Sarrerak

Abonuak saltzeko epea, esparru klasikoko kontzertuetarako bakarrik, datorren astelehenean, abenduak 4, hasiko da eta 2018ko otsailaren 17ko larunbatez amaituko.. Kursaal Eszenako denboraldi berriko abonuak 5 kontzertu barne hartzen ditu (Europa Galante; Jordi Savall; Tonhalle Orchester Zurich; Scottish Chamber Orchestra, eta Euskal Barrokensemble) eta bost ikuskizun horien banakako sarreren salneurriaren %20ko beherapena eskaintzen du.

Abonuen salmenta Kursaaleko leihatilan bakarrik egingo da (astelehenetik ostiralera, 11:30etatik 13:30ra. Ostegun eta ostiraletan baita 17:00etatik 20:00ra ere. Larunbatetan 17:00etatik 20:00ra).
Denboraldi berriko sarrera solteen salmenta, ere egun rotan bertan datorren astelehenean, abenduaren 4an, abiaraziko da. Kursaaleko leihatilan (astelehenetik ostiralera 11:30etatik 13:30etara. Ostegun eta ostiraletan baita 17:00etatik 20:00etara ere. Larunbatetan 17:00etatik 20:00ra), edota Kursaal zentroko web orrian: www.sarrerak.kursaal.eus helbidean erosi ahal izango dira sarrerak.