Gaurkotasuna / 13 urria, 2022
- Adin guztietako publikoari zuzenduta (4 urtetik aurrera) euskarazko musikal honek gizonen eta emakumeen arteko aukera-berdintasuna eta lan-baldintzen berdintasuna aldarrikatzen ditu.
- Sarrerak salgai www.kursaal.eus webgunean eta Kursaaleko leihatiletan.
2019an Kursaalen aurreko ekoizpena, “Aske!” aurkeztu ondoren, Jaso Fundazioa "Sutan Musikala" lanarekin itzuliko da, 12 eta 16 urte bitarteko gazteek publiko guztiarentzat egindako sorkuntza berrienarekin. Oraingo honetan, musikalak herritarrak kontzientziatu nahi ditu gizonen eta emakumeen arteko aukera-berdintasuna eta lan-baldintzen berdintasuna sustatzeko beharraz, eta, aldi berean, emakumeek eta feminismoak gizartean duten papera aldarrikatzen du. Horretarako, Clara Lemlich aktibistaren istorioan inspiratzen da. 1909an, New Yorken, Clara Lemlich Triangle lantegian hasi zen lanean; han emakumeen lan-baldintza kaskarrak ezagutu ondoren, beste 20.000 lagunekin batera, "alkandora-saltzaileen greba" izenez ezagutzen dena bultzatu zuen. Klarak, bere kideak konbentzitzeko, historiako hainbat emakumeengan bilatzen du inspirazioa: Cleopatra (Egipto), Whan Zenyi (Txina), Marie Coulon (Euskal Herria) eta Epiroko Olimpia (Grezia); emakume horien istorioak irakurtzeak bere ekintza garatzeko behar duen indarra eta inspirazioa ematen dio. 1911n, Triangle lantegian gertatutako sute batek agerian utzi zituen emakumeen lan-baldintza eskasak.
Imanol Janices eta Irantzu Zabaltzaren zuzendaritzapean, Jaso Ikastolako 12 eta 16 urte bitarteko ikasleek ekoizpen original berri hau garatu dute, honelako proiektu eszeniko bat sortzeak dakartzan prozesuetan erabat inplikatuz: gidoia eta komunikazioa, koreografien sorkuntza, argiztapen eta soinuaren diseinua, eszenografiaren konposizioa, jantzien aukeraketa, muntaia eta desmuntaia, baita aktore-lana ere. Horrela, musikalaren gaiak biltzen dituen balioetan sakontzeaz gain (gizonen eta emakumeen arteko eskubide- eta aukera-berdintasuna, etab.), gazteek beste balio batzuk lantzen dituzte, hala nola diziplina, talde-lana, motibazioa eta, batez ere, laguntasuna. STEAM (Zientzia, Teknologia, Ingeniaritza, Artea eta Matematika) metodologian oinarritutako hezkuntza-programa baten parte den proiektu baten hamargarren edizioa da “Sutan Musikala”; horri esker, ikasleek ikasgai horietan eskuratutako konpetentzia guztiak curriculumetik kanpoko proiektu pedagogiko batean aplika ditzakete.
Ikuskizunak zuzeneko musika izango du, eta Iruñeko Gazte Orkestrak joko du zulogunetik.
Joan den maiatzean Barañainen estreinatu eta Iruñeko Baluarten izan berri den “Sutan Musikala”ren egile gazteek ilusioz datoz Donostiako Kursaal Auditoriora.
Kontzertu honetarako sarrerak www.kursaal.eus webgunean eta Kursaaleko leihatiletan eros daitezke.
SUTAN MUSIKALA
Urriaren 22an, igandea, 18: 00etan. 7 €/ 3 € (12 urtetik beherakoak). Euskaraz · 4 urtetik aurrera
