menu

Suediako Ganbera Orkestra Kursaalean arituko da Mozarti osoki eskainitako programa batekin

Gaurkotasuna / 8 otsaila, 2016

Suediar taldea, Thomas Dausgaarden zuzendaritzapean, Kursaalen arituko da, bihar asteartean, otsailak 9, arratsaldeko 20:00etan eta Salzburgoko jeinuaren bi obra guztiz garrantzitsu interpretatuko ditu (39. eta 41. sinfoniak) . Hauetaz gain, klarinetista guztien errepertorioan dagoen eta musika klasikoko obrarik ezagunenetako den  Mozarten Klarineterako kontzertuak osatuko du egitaraua.

Bere bizitza laburraren azkenaldian, 1788ko uda oparoan, ondu zituen Mozartek bere azken hiru sinfoniak (39, 40 eta 41.a), bi hilabeteko epean. Baliteke etorkizuneko kontzertuetarako pentsatuak izatea, baina egilea bizirik zela ez ziren inoiz jo. Azkenaurrekoa da azkeneko seiek osatzen duten multzotik gutxiena ezagutzen dena, eta egileak bere alaba Teresa hil baino hiru egun lehenago bukatu zuen. Aldi beltza izan zen hura Mozarten bizitzan: Don Giovanni operak arrakasta izan zuen Pragan baina ez hainbeste Vienan, eta gero eta larriagoa zen musikagilearen egoera ekonomikoa. 39. sinfonia eta orobat 41.a egiazko maisulanak dira, ordu arte inoiz lortu ez zen adierazkortasuna, dramatismoa eta trinkotasuna dutenak, eta sinfonia klasikoaren eta musikagilearen obra sinfonikoaren gailurrik beteena suposatzen dute. Kontrapuntua eta harmonia maisutasun bikainez daude landuak, itxurazkoa besterik ez den soiltasun batez disimulaturik. Gai honi buruz asko idatzi bada ere, ez dago sentimendu erromantikorik Mozarten azken sinfonietan, kutsu tragiko, suhar eta pozez betetako bat baizik. Harentzat musika, oroz gain, horixe zen, musika, pasioen, zoritxarraren edo zorionaren gainetik.

1791 urtea, konpositorea hil zena, maisulan handien urtea da: urte hartan ondu zituen pianorako azken kontzertua, Txirula Miragarria, Requiema, KV 614 Hari Kintetoa… eta KV 622 Klarineterako Kontzertua. Bigarren mugimenduko doinu cantabile ederragatik da batez ere azken hori ezaguna, eta Mozarten anaikide masoia eta lagun handia zen Anton Stadlerri dago eskainia. Tresnak berez dituen aukera guzti-guztiak, haren sonoritatea, ezin imitatuzko betetasun batez ustiatzen ditu, eta sonoritate hori birtuosismoa ahantzarazten digun samurtasunak eta malgutasunak bakarrik berdintzen baitu.  Oraingoan, obra hau Martin Fröstek joko du, batzuentzat “munduko klarinetista hoberena” denak.

SUEDIAKO GANBERA ORKESTRA
Otsailak 9 asteartea / 20:00
Thomas Dausgaard
, zuzendaria
Martin Fröst, klarinetea

39.Sinfonia, W.A. Mozart
Klarineterako kontzertua, W.A. Mozart
41.Sinfonia, W.A. Mozart